Nga dei u ‘sai bteng ïa ki kam ba u Maheh u la ieh shadien: Synshar Kupar Lyngdoh

Shillong, Ïaïong 18: U Kyrtong jong ka United Democratic Party(UDP) uban ïakhun na Sohïong Constituency u Bah Synshar Kupar Roy Lyngdoh Thabah u la ong ba ja jingmih jong u ban ïakhun ïa kane ka elekshon ha Sohïong ka dei ban bteng biang ïa ki kam kiba u Maheh Don u la ieh shadien da ka jingklad ba kynsan jong u na kane ka sla pyrtehi.
“Nga dei u sai bteng jong u Maheh Don bad ki kam kiba u la leh bad kiba u sahnud ban pyndep nga dei u sai bteng ban pyurlong ïa kiba u kñi jong nga um pat lah lut ban pyndep,” ong u Bah Synshar haba kren sha ki lad oatahi khubor hadein ba la dep ban thep kyrteng kum u kyrtong ka UDP.
Haba kylli ïa ki kam kiba u thmu ban pyndep lada ki paidbah ki ailad ïa u ban mih khmat ïa ka Sohïong, u Bah Synsar u la ong ‘i maheh ha ka por ba i wan thep kyrteng i la kren shai ba ka kam kaba ha khmat kaba in pyndep ka dei ban maramot ïa ki jingjot kaba u MLA barim ka Sohïong (Samlin Malngaing) u la wanrah ha kine ki san snem bad kane kan dei ruh ka kam ba ha khmat eh jong nga,’ u la ong.
Haba kylli, u la jubab ba na ka liang jong u u don ka jingsngew skhem ba ki paidbah ka Sohïong kin pynjop ïa u namar baroh ki la kwah ïa ka jingkylla bad ban ïoh ïa u MLA uba don ka jingstad ban long u nongthaw aiñ bad u nongsaid ka constituency.
Haba ïadei bad ka jingïaleh pyrshah jong u ïa u Bah HDR Lyngdoh ha u snem 2018 da kaba kyrshan ïa u kyrtong ka HSPDP ha kito ki por u Bah Samlin Malngiang, “Kito ki dei kiba la leit, bad u Maheh u dei u kñi jong nga bad ngi dei na kajuh ka doh ka snam bad kumba ïa nga dei u Maheh ba la jer ïa ka kyrteng pdeng jong nga bad ngam artatien ba ki paidbah kin ai lad beit ïa nga ha kane ka kynti,” u la jubab.
Na ka liang pat u President ka UDP u Bah Metbah Lyngdoh u la ong ba kat kum ka jingtip kaba ka party ka la ïoh na ki paidbah ha Sohïong ki la kwah ïa ka UDP ban jop ha kane ka kynti kaba mynta.
“Ngi donbok ba ngi la ïoh da u kyrtong uba biang pura kum u nongthaw aiñ bad ngim don jingartatien eiei ba un jop na Sohïong,” ong u Bah Metbah haba jubab ïa ka jingsngew skhem ka party ban jop na katei ka seat.
“U Bah HDR Lyngdoh u la dei u nongthaw aiñ uba trei shitom bad ubna don ka thong ban pynurlong ïa ki jingangnud ki paidbah bad na kata ka daw ngi sngew skhem ba ki paudbah kin pynurlong ïa ka jingkwah u Bah Don ba ka seng riewlum kan jop ha kane ka elekshon na Sohïong,” u la bynrap.
Ha kane ka sngi la synran lang ïa u Bah Synshar da ki nongïalam jong ka UDP ba kynthup naduh u President ka party u Bah Metbah Lyngdoh, u Working President bad uba long ruh u Myntri ka sorkar jylla u Bah Paul Lyngdoh bad kiwei kiwei ki nongïalam.
La ïohi ruh ba ha kane ka sngi da ki spah ngut ki paidbah na Sohïong ki la wan ban synran lang ïa u Bah Synshar ha ka jingwan thep kyrteng jong u kaba la long ha Ophis jong ka Deputy Commisioner ka East Khasi Hills.