Shillong, April 18: U Myntri ka sorkar jylla uba long ruh u MLA ka Pynthorumkhrah u Bah Alexander Laloo Hek hynne ka sngi Hatmajai ula pynpaw ïa ka jingsngew ba ka Roster System ka dei ban treikam naduh nangne shakhmat ym naduh ki snem ba la leit noh. Une u Nongïalam ka BJP ula pyntip ba ula leit ban ïakynduh ïa u Myntri Rangbah ka jylla u Conrad K Sangma ban pynsngew ha kaba ïadei bad ka Roster System bad kiwei kiwei ki mat.
Haba ïakren bad ki nongthoh khubor, u Bah Hek ula ong, katkum ka jingsngew jongu shimet, dei ban pyntreikam ïa ka Roster System nangne shakhmat ym naduh ki por kiba mynshwa.
Une u nongialam ka BJP ula ong, ba na ka liang ka seng BJP ka la dep thung ïa ka committee ha kaba ïadei bad kane ka mat, ha kaba u MLA barim u Bah HM Shangpliang u long u Convener bad ki dkhot ki kynthup ïa u MLA ka seng u Bah Sanbor Shullai, u President ka BJP u bah Ernest Mawrie, u nongaiktien ka BJP u Bah M. Kharkrang, ki Legal Adviser ka seng kiba kynthup ia u Bah Vivan G Kynta bad u SP Mahanta bad arngut ki nongïalam ka seng na rilum Garo kiba kynthup ïa u Edmund K Sangma bad ka Ferlin CA Sangma.
