SHILLONG, K’lyngkot 08: U Myntri ba dei peit ïa ka tnad Sports and Youth Affairs jong ka Sorkar Jylla Meghalaya – u Bah Shakliar Warjri, ha ka sngi Balang u la ong ba ka Sorkar dang shen ka la aiti ïa ka jingtyrwa sha ka sorkar pdeng na bynta ban ïoh pynlong ïa ka jingïalehkai National Games kaba 39 ha u snem 2027.
Haba ai jingkren sha ki lad pathai khubor, u Bah Shakliar u la ong, “Dang shen Nga la ïakynduh ïa u Myntri ka Sorkar Pdeng ba dei peit ïa ka tnad Sports and Youth Affairs ha ka 20 tarik u Nohprah 2024 ha Delhi ha kaba Nga la aiti ïa ka jingtyrwa ban pynlong ïa ka 39th National Games hangne ha ka jylla ba itynnad jong ngi ka Meghalaya.”
U Bah Shakliar u la ïathuh ba u la pynlong ruh ïa ka jingïakren bad ka tnad bad la pyntip ba lada ailad ban pynlong ïa ka National Games, ka Sorkar jylla ka long kaba la lah bha ban pdiang.
Ha kaba ïadei bad ka jingpynkhreh, u Bah Shakliar u la ong, “Hooid – hooid Ngi la long ba la khreh hynrei watla katta ruh ki don shibun ki jingpynkhreh kiba donkam ban pyndep bad hooid, Ngi kum ka Sorkar Ngi la dang trei shitom ban pynthikna ba ka National Games kaba ngin pynlong ha Meghalaya kan long kaba seisoh.
U myntri u la pyntip ba ha kaba ïadei bad ki jingtei, bun ki jingtei ki dang wan ha kylleng ki district hapoh ka jylla. “Kumta nga sngewskhem ba lada ailad ngin sa lah ban pynlong ïa ka National Games” u la bynrap.
Lah ban kdew, ka National Games kaba 37 la pynlong ha Goa (kaba la sdang naduh 25 tarik Risaw haduh 09 tarik Naiwieng 2023), katba ka 38th National Games mynta u snem kan long ha Uttarakhand. Kumta ka Meghalaya ka khmihlynti bad kyrmen skhem ban ïoh ïa ka kabu ban pynlong ïa ka National Games – kaba dei ka lympung ïalehkai kaba hehtam jong ka ri, ha u snem 2027.
Ha kaba ïadei bad ka Meghalaya Games 2025 ka ban sa wan, u Myntri ba dei peit ïa kane ka lympung u la ong ba ka jingplie kan long ha ka 20 tarik u Nailar bad baroh ki jingpynkhreh ki dang ïaid shakhmat bad baroh ki long kiba ryntih bad ha kaba beit.
“Baroh ki jingïalehkai (discipline) yn pynlong hapoh West Jaintia Hills district lait noh kawei ne ar tylli ki jingïalehkai ba kynthup ïa ka golf bad ka swimming ki ban pynlong ha Shillong” la ong u Bah Shakliar.
