K atba shaba phai ka jingdheng kali ha kylleng ki shnong ka sor Shillong ka la pynlynga bad pynsuhsat haduh katta katta ïa ki nongleit nongwan da ki kali saw shaka. Watla mynta ka aiom ba ki skul ki kolej ki dang ïoh shuti tlang hynrei ka jingdheng kali ka ïai jia beit manla ka sngi khamtam ha ki surok ka sor Shillong la ka long sha kano kano ka bynta jong ka sor.
Ki Pulit ka Shillong Traffice Police wat ha i bor barit da ka jingïarap lang jong ki Home Guard Volunteer ki la pyrshang borbah ban weng ïa ka jingdheng kali ha ka nongbah Shillong, hynrei kumba ka paw, ka jingkharoi ki kali saw shaka bad ki thuk thuk ar shaka ha nongbah ka la nang kiew nang kiew katba nang mih ki sngi bad kane ka nang pynsuhsat ym tang ïa ka tnat Pulit hynrei wat ïa ki paidbah nongïaid nongieng kiba ïakynduh mawsiang ha ka leit ka wan namar ka surok ka sah hi kumjuh.
Ka jingpyrshang jong ka Sorkar ban shna ïa ki surok Bye Pass ka la ïarap shikatdei eh ïa ka jingdheng kali kaba jur ha nongbah Shillong. Hynrei tang shu poi ka por plie ïa ki skul tang ha u bnai Rymphang, ka jingdheng kali ka long kaba shyrkhei. Dang bun hi kiba sngew tynnat ban ïaid da ka kjat haba leit jingleit hajan namarba ka kham poi kloi ban ïa ka shong kali da ki kynta.
Haba pyrshang ban peit thuh ïa ka jingdheng kali, ka daw ka dei na ka jinglong amriang jong ki nongñiah kali saw shaka bad kiba ñiah thuk thuk ar shaka kiba pyrkhat tang ïa ka malade ka wanrah ïa ka syrtok ïa kiba bun namar ka jingïatynruh bad ban tur shakhmat khlem da pyrkhat ba ïa lade ruh ki ngat hi ha kajuh ka apot dheng kali. Ka jingbym pynibor jong ki Pulit ïa ki nongñiah kali bad ïa ki nongñiah thuk thuk ar shaka khlemakor ka long kawei na ki daw kaba ju wanrah ïa ka jingdheng kali.
Ki don ki khep haba ki kali shimet tah iit iong jongno re jongno nalor kaba pynpah sa ka sairen la kum kiba kyrkieh eh ban poi iing, ka la long ka daw kaba pynjur bha ïa ka jingdheng kali ha kaba wat ki Pulit ruh ki shu ang tyngheng khlem nud saham shikyntien watla ka tnat Pulit ka la trei borbah ban tar naphang ïa ki kali kiba tah ïa ki plastik rong iong ha ki jingkhang iit kali.
Ka jingbym bud ïa ki kyndon aiñ ñiah kali dei tang namar ka jingsngew baheh da ki nongñiah kali khamtam leilei haba ñiah da ki kali rem dor.
Ka tnat Pulit watla ka la pynshitom ïa ki nongpynkheiñ da kaba shaiñ kuna bad da kaba pyndait da u Khnap pynban ki paidbah ki dang ïai leh saitlah ïa ki jingmaham bad jingmana jong ka tnat Pulit.
Ka jingailad ban pynieng ïa ki kali shilynter ka surok ka dei kawei na ki dawbah kaba ju wanrah ïa ka dheng kali namar ki don beit ki riewshimkabu ki ban phrung ban pynieng ïa ki kali wat haba ki la ïohi pylleiñ pylleiñ ba wat jaka pynieng kali ruh kam don shuh. Tangba biang ka malade shimet, kam pher watla kiwei ki suhsat ne ki khñium.
Ha Khyndai Lad ka jingailad ïa ki Bos Saw ban pynieng ha shilynter surok ka dei ka daw kaba wanrah ïa ka jingdheng kali
nalor ka jingïaknieh ïaid jong ki kali kiba rung katba mon watla ka tnat Pulit ka la buh da u ksai ban pynïakhlad ïa ki kali kiba leit sha Motphran bad ki kali kiba pynkhun pyllun na Khyndai Lad ban hiar sha Polo bad ban kiew sha surok Kashari.
Ha Motphran, ka jingailad ïa ki Bos Saw ban leh mon bad leh trai kat haduh ban pynlong kum ka Parking Lot hapdeng surok ki dei ki dawbah kaba wanrah ïa ka jingdheng kali kaba jur bha ha ka surok Guwahati-Shillong Road. Sa ka jingmih ki nongdie jingdie hapdeng surok ha Motphran la i thik kumba ym don nongsynshar shuh ban peit ïa kane ka jinglehmon jong ki paidbah.
Khamtam ha ka por janmiet, la sakhi ba ki Bos Saw ki ïaid kum ki mattah ban thep pyndap da ki nongshong kali khlem pyrwa la ka surok ka don hapdeng ka jingdheng kali.
Ha Laitumkhrah, ka daw na ki jingdheng kali ka dei namar ba ka long ka jaka pdeng jong ka shlem Pule Puthi jong ka sor Shillong bad ka Jylla Meghalaya, ha kaba baroh kiba na Sor bad ki shnong Khapsor ki ïabeh ban phah skul sha ki skul kiba don ha Laitumkhrah. Da ki phew hajar tylli ki kali kiba tyllun ha ki surok ka Laitumkhrah ha ka shi sngi nalor kata, sa ki kali kiba wan na Jowai. Kane ka dei ka daw kaba la idonkam haduh katta katta ba ki bor pynïaid skul ki la dei ban pyrkhat thymmmai ban weng ïa ki sohkyrdot da kaba buh noh da ki School Bos kiba mynta la ïohi ba tang khyndiat tylli ki skul kiba pyndonkam ïa ki School Bos namar ka jingbym mynjur jong ki kmie ki kpa..
Ka ladei ka por ba ka Sorkar Jylla kan hap ban pyrkhat thymmai ban pynïar ïa ka Sor sha ka New Shillong kumba ka la thmu naduh ki snem kiba mynshwa namar katba nang mih ki bnai ka jingbunbriew ha ka sor ka la nang kiew artet.
