Ai khublei u Syiem Raid Marwet ïa ki khun ki hajar ba ïa snoh kti lang ha ka Lehniam Shad Sohjer

Nongpoh, January 20: U Syiem ka Raid Marwet ba hap ha ka Hima Mylliem Syiemship, u Paiem Ken Syierm u la ai khublei kyrpang ïa baroh ki khun ki hajar jong ka Raid Marwet, kaba dei hadien ba ki khun ki hajar ka Raid ki la ïa snoh kti lang na ka bynta ban pynlong ïa ka lehniam Shad Soihjer kaba jop bad kaba la ïaid beit ïaid ryntih naduh ka nguh ka dem blei bad ka lehkmen leh sngewbha ki khun ki hajar.
Kum ban pynkynmaw, ka lehniam Shad Sohjer ka Raid Marwet ka la sdang naduh ka 17 tarik u Kyllalyngkot 2024 da ki prorkam lehkmen bapher bapher bad ka nguh ka dem blei bad mynta ka sngi ka la poi noh sha kaba kut da ki jignlehkmen ki khun ki hajar haba pynkut noh ïa kane ka lehniam Shad Sohjer.
Na ka liang u Syiem ka Raid Marwet, u Paiem Ken Syiem, haba pyndep ïa ka leh niam ka leh rukom kaba kham kongsan hynnin ka sngi, u la ai ka jingkhublei kaba kyrpang naduh ki Longsan ki mansan, ki nongïalam Shnong bad khamtam ïa ki khun ki hajar, namar dei lyngba ka jingïasnoh kti lang jongki, ba kane ka lehniam Shad Sohjer ba la pynlong da ka Raid man la u snem ka la long kaba phuh ba phieng bad kaba jop kumba la angnud da ka Raid Marwet.
U la ong ruh kum u khliehduh jong ka Raid, u dap da ka mynsiem jong ka jingkmen ba la lah ban pyhndep ïa kane ka leh niam Shad sohjer, namar ka jingpynlong ïa kane ka leh niam shad sohjer kumba la ïalam da ki longshuwa manshuwa kam dei satia tang kata ka jingainguh ïa u Blei Nongbuh Nongthaw kaba ki ju pynlong hadien ba la dep lum dep lang bad shi bynta ruh ka long ban pynneh pynsah ïa ki riti ki dustur jong ka Raid.
Shuh shuh, U Syiem ka Raid Marwet, u Paiem Ken Syiem u khot u wer ruh ïa ki paidbah ban dang don kata ka mynsiem jong ka jingïatylli bad ka jingïatrei lang ym tang ha kaba pynneh pynsah ïa ka riti ka dustur jong ka Raid, hynrei kum ki khun ki hajar ki dei ruh ban dang ai ka jingïatrei lang na ka bynta ban ïa trei na ka bynta ka bha ka miat, ka shongsuk shongsaiñ bad ka roi ka par jong ki paidbah hapoh ka Raid hi baroh kawei, u la bynrap.