Shillong, Rymphang, 15: Ka War Jaintia Students’ Union (WJSU) Amlarem, ka pdiang sngewbha ïa ka rai jong ka Sorkar Jylla ban thaw da ka Standing Coordination Committee (SCC) khnang ban wanrah ïa ka jingïasngewthuh jingmut hapdeng ki shipai BSF bad ki paidbah kiba shong basah ha ki shnong khappud ka ri India bad ka ri Bangladesh.
Ka Sorkar Jylla ka la shim ïa ka rai ban thaw ïa ka Standing Coordination Committee (SCC) hadien ba u Symbud Myntri Rangbah ka Jylla uba khmih ïa ka tnat Kam Pohing u Bah Prestone Tynsong u la khot da ka jingïalang ha ka sngi Baar ïa u IG BSF u H. Dhilon, ïa u DGP ka Jylla u Dr. LR Bishnoi bad ïa ki nongïalam shnong ban ïakren halor ka jingkynnoh leh tohmet jong ki shipai langrut BSF ïa u officer incharge ka Muktapur Veterinary Dispensary, u Dr. Seiboklang Buam kaba la jia ha ka 11 tarik mynta u bnai.
“Ha kawei pat ka liang ka seng kam sngew ïahap ba kum kine ki komiti kin don ha ki Subdivisional Level namarba kane kan ym wanrah ïa ka jingïasngewjan hapdeng ki shipai ïada khappud bad ki nongshong shnong ba sah ha ki shnong khappud,” la ong u Publicity Secretary ka WJSU ha u kyrwoh ba la phah sha ki lad pathai khubor.
“Ka seng katkum ka jingthoh ba la ha u Assistant Commandant ki BSF, Muktapur, ha ka 12 tarik mynta u bnai bad ai kopi ruh ha u Sub-Divisional Officer (SDO) Amlarem Civil Subdivision, ka seng ka kwah bad ka thrang ba ha manla ki Asistant Commandant Level kin don kum kine ki komiti hapdeng ki shipai Border Security Force (BSF) bad ki Rangbah Shnong khappud hapoh ka pud treikam jong u Asstt Commandant,” la ong ka seng.
“Halor ka jingmut jong ka Sorkar Jylla ban thaw ha ki Sub-Divisional Level kan ym wanrah ïa ka jingïa sngewjan hapdeng ki shipai ïada khappud bad ki paidbah nongshong shnong ha ki thaiñ khappud baroh kawei,” la ong ka seng bad bynrap, ‘seng ka seng kan sa leit ban ïakynduh ïa u Symbud Myntri Rangbah uba peit ïa ka tnat kam Pohing ban ïakren halor kane ka bynta.”
