New Delhi, Rymphang 15 : Da ki hajar ngut ki paid nongrep na ki jylla Punjab bad kiwei de ki jylla ki la tur sha nongbah Delhi hynin ka sngi, hynrei ki la pynkut noh ïa ka jingïaid jong ki shiteng lynti da kaba byrngem ba kin tur biang lashai ka sngi.
Da kaba pynbna ba ka jingsangeh tur jong ki mynta ka sngi ba ka long kum ka Cease Fire, kine ki nongrep ki la ong, “Ngi la rah lypa ka bam ban dap 6 bnai, ngim salia ban sahmiet hangno hangno ruh bad ngbin tur tad haduh ban da poi ha Delhi”, ki la ong.
Kane ka jingtur jong ki sha nongbah jong ka ri ka long ban pynbor ïa ka sorkar pdeng ban pdiang ïa ki jingdawa jong ki, kumba ki la tur ban dawa ha u snem 2020-’21 bad kawei na kine kadei ka jingdawa ban don ka Minimum Support Price.
Ha kane ka jingïatur ki Nongrep, ka la don ka jingïakhyrwit bad ki Pulit ha man la ki jaka ba poi ha ki khappud jong ki jylla ban poi sha Delhi. Ki Pulit ki la pynap da ki barricade ha ki surok, ki la pynap da ki prek, namar ba ki nongrep ki la wan da ki kali, ki traktor. Ki don ki jaka ruh ba ki Pulit ki la siat da ki tear gas ban khanglad ïa ki nongrep ban tur sha nongbah Delhi.
Ha u snem 2020-’21, ki nongrep ki la sah ha surok haduh kumba 13 bnai ban ïakhun pyrshah ïa k sorkar jong u Narendra Modi halor ki jingdawa jong ki. Hatei ka pore arngut ki Myntri jong ka sorkar pdeng, ki la ïakynduh ïa ki nongïalam jong ki nongrep kaba la poi sha ka jingiakut ban weng noh ïa ka Electricity Act 2020, nangta ka jingsiew bai luksan ia ki nongrep kiba la ïap ha Lakhipur, Uttar Pradesh bad ka jingweng noh ïa ki mukotduma pyrshah ïa ki nongrep. Hynrei ki jingdawa ba kongsan kum ka Minimum Support Price, ka jinman noh ïa ka ram jong ki nongrep bad ka jingpyntreikam ïa ki jingai jingmut ka Swaminathan Commission.
