Shillong, Rymphang, 15: U Bah peter Challam uba shong basah ha ka shnong Laitkor bad uba dei ruh u muktiar na ka Shillong Bar Association (SBA) ha ka sngi Palei u la pynbna paidbah ba un aireng ha ka Election Lok Sabha 2024, na Shillong Seat kum u kyrtong Independent.
Ha ka jingïakren bad ki lad pathai khubor ha Shillong Press Club, u Bah Peter u la ïathuh, naduh ba u dang long u dkhot jong ka Khasi Students Union (KSU) mynba u Bah Bull N. Lyngdoh u dang long u President, u la don ka mynsiem shakri bad ban ïakit ïabah ïa ka khia ka shon jong ka jaitbynriew bad u la ong ba mynta ka por ka la ih ïa u ba un rung noh sha ka jylli jong ka saiñ pyrthei khnang ba un dup lah ban ïasaid ïa ki jingeh jong ka jaidbynriew.
Shuh shuh, u la ong ba watla um dei uba don ka spah ka phew hynrei u don pat ïa ka mynsiem ban shakri, ban ïasaid ïa ki jingeh jong ka Jylla hapoh ka Parliament bad u la kyntu ruh ïa ki paidbah nongthep vote ban ai jingkyrshan lem ïa u, khnang ba un dup lah ban pynurlong ïa ka jingangnud ka jong u ha ka kam shakri paidbah.
Da ka jingmih madan jong u Bah Challam, ki kyrtong ki ban aireng ha ka elekshon Lok Sabha na Shillong Constituency ki don 6 ngut, ba kynthup ïa u MP ba mynta u Bah Vincent H Pala na ka Congress, ka Myntri Sorkar ka Dr. Ampareen Lyngdoh na ka National People’s Party (NPP), u Prof. Ricky. J Syngkon na ka Voice of the People Party (VPP), u Bah Robertjune Kharjahrin na ka Regional Democratic Alliance bad Prof. Lakhon Kma kum u Independent.
