Jowai, Nailar 07: Ka Education Sub-Committee jong ka Warjaiñtia Students’ Union (WjSU) kawei na ki kynhun seng bhalang kaba peit ïa ka bha ka miat jong ki samla pule ka thaiñ mynta ka sngi saitjaiñ 16 tarik u Nailar 2025 kala ïoh ban sam ïa ka “Scholarship Distribution Ceremony” sha ki 15 ngut ki samla pula ka thaiñ War Jaiñtia hadien ka jingpyndep jong ki ïa ka Follow up Examination 2025.
Ïa ka jingïalang mynta ka sngi la pynlong ha Riwar Jaiñtia Church of God Secondary School Ladjaplem Amlarem Sub-Division, ha ka jingdonlang u kongsan uba dei u EM ka JHADC ma Medling M. Swer, ha ryngkat u MDC ma Jamshaphrang Pohtam kum u symbud kongsan, u ma Alban K Gashnga uba dei u Adviser ka seng, ki nonghikai, kiwei de ki khynnah skul lem bad ki kmie ki kpa.
Ïa kane ka Follow up Examination la pynïakhun ha ki lai tylli ki Section-I, II & III bad la jied mar 5 ngut na kawei ka Section baroh kiba ïoh ïa kane ka Scholarship ki don 15 ngut bad kitei ki samla pule ka thaiñ kin ïoh jingïarap da ka pisa kaba 1000/- tyngka shibnai na ka bynta 12 bnai lynter.
Na ka liang u General Secretary ka WJSU samla Everest Langstang ha ka jingkren ula pynsngew ïa ki kam ba bha jong ka seng, naduh ki kam Sports bad kumjuh ïa ka jingbha haka pule puthi hapoh ka thaiñ War Jaiñtia. Shuh shuh ula ong da ka jingïasnohkti lang jong ki paidbah nongshong shnong ka thaiñ la lah ban pynïaid shakhmat ïa ki kam jong ka seng wat hapdeng shibun ki dieng pynkiang kiba ka seng ka hap ban ïa kynduh, la ong u samla Everest.
U ma Medling M. Swer kum u kongsan haba ai jingkren ula ai ka jingïaroh ïaka seng WJSU kaba la pynlong ïa kane ka Exam ban jied ïa kitei ki 15 ngut ki samla pule ban ïoh jingïarap pisa, ha ka juh ka por ula ai ka jingïaroh ïa ka seng bad ula kular ban don lang bad seng ha kino kino ki kam ba bha.
Ula kyntu ruh ïa ki khun samla da kaba u ong ka jingstad ka long kaba donkam eh ha ka jingim bad ka jingstad ka long ka nongïada haka jingim. Kum u MDC ka thaiñ ula pynsngew ba u kloi ban ai kano kano ka jingïarap lyngba kane ka skul bad kiwei de ki kam jong ka shnong ha Ladjaplem,
Ula kren diaw halor ka jinghiar shaba palat jong ka pule ka puthi hapoh ka thaiñ bad ka jylla hi baroh kawei, kumta ula pynsngew kaba donkam ïa ka sorkar mynta ban shim ïa ki lad ki lynti kiba hakhmat eh ban pynbeit ïa ka jinglong ka pule ka puthi.
Shuh shuh ula ong kum ki samla pule ki ïakynduh shibun ki jingeh ban bteng ïa ka jingpule, hynrei lada ki don ïa ka mon u Blei ym ju ieh noh ha ka jingim, da kaba u ai nuksa ha ki por jong u ba u bteng ïa ka jingpule ha ryngkat ka jingtei bylla.
U ma Jamshaphrang Pohtam ula ai ka jingkitbok kitrwiang ïa kitei ki samla pule kiba ïoh ïa ka jingïarap na ka seng, ha ka juh ka por ula kular ban ai jingïarap pisa na ka bynta shibnai ïa kitei ki samla pule.
Ha kane ka sngi la sam khusnam ruh sha ki ar ngut ki samla ka thaiñ kiba la pass ïaka Exam jong ka MPSC na ka bynta ka kyrdan ophisar, Ïa ka jingïalang ha kane ka sngi la pynïaid da u Vice President ka seng u samla Heart Casing Dkhar, katba ïa ki kyntien ai khublei la ïoh na ka Grateful A Pohthmi kaba dei ka Education Secretary WjSU Central Body, Amlarem.
