Hadien ba ladep pynmih ïa ka electoral roll yn pynbna ka ECI ïa ka tarik elekshon MP shiteng samoi: Meghalaya CEO

Shillong, Nailur 15: U Chief Electoral Officer (CEO) ka Meghalaya, Dr. B D R Tiwari, ha ka Sngi Ba-ar u la ong ba ka Election Commission of India (ECI) kan sa pynbna ïa ka por bad ka tarik ban pynlong ïa ka elekshon shiteng samoi sha Iing Dorbar Thawaiñ Lok Sabha na kane ka Shillong Parliamentary Constituency hadien ba la dep pynkhreh bad pynbeit ïa ka electoral roll.
Haba la kylli ïa ka por kaba lah ban pynlong ïa kane ka by-election, u Tiwari u la ong ba ka rai kan shong ha ka Election Commission of India.
U la ong ruh ba ka Commission kan shim ïa ka rai hadien ba la dep ïa ka jingpynbeit thymmai ïa ka electoral roll.
Katkum ka jingpyntip jong ka Election Commission, u la ong, “Haba la dep pynkhreh ïa ka electoral roll, ka Commission kan sa shim ïa kano kano ka rai bad kan pynbna ïa ka por ban pynlong ia ka elekshon.”
Namarkata, u CEO u la ong ba ha kane ka por um lah ban tip lypa ne ban ai kano kano ka jingkynthoh halor ka tarik jong ka by-election.