Palat 82% ladep pynlong ïa ki Hearing, 542 ngut ki nongthep vote lap ba kim biang ki kot ki sla

Shillong, Nailur 15 : Palat 82 percent ki hearing hapoh ka Special Intensive Revision (SIR) 2026 la dep pynlong ha Meghalaya, katba 542 ngut ki nongthep vote la lap ba kim don ki kot ki sla kiba biang, ong u Chief Electoral Officer (CEO) ka Meghalaya, Dr. BDR Tiwari, ha ka Sngi Ba-ar.
U Tiwari u la pyntip ïa kane hadien ka jingbishar paidbah lyngba ka virtual meeting bad ki Deputy Commissioner, District Election Officer, EROs bad AEROs, ryngkat ki nongmihkhmat jong ki seng saiñpyrthei ba la ithuh.
Katkum ka jingong jong u CEO, na ki 21.69 lak ngut ki nongthep vote kiba don ha ka Draft Electoral Roll, la pynmih ïa ki notis na ka bynta 6,51,735 tylli.
Shuh shuh la ïathuh ba na kine, 6,46,397 tylli ki notice la dep sam, katba 5,190 tylli ki dang sah.
U ong ruh ba haduh mynta, la dep pynlong 5,36,468 tylli ki hearing, kaba long 82.31 percent na baroh ki notice kiba la pynmih.
U CEO u la pynshai ba ym don ka kyrteng jong kino kino ki briew ban shah weng khlem da bud ïa ka rukom treikam kaba la buh da ka Election Commission.
U la ong ruh ba ka jingshah phah notice kam mut ba yn weng noh beit ïa ka kyrteng. Ki nongthep vote kin ïoh ka lad ban pynshisha bad ban wan sha ka hearing katkum ka rukom treikam.
Na ki notice kiba la pynmih, 2,22,786 tylli ki dei ki ‘No Mapping’ case, katba 4,28,949 tylli ki dei ki case ba don jingïapher ha ka mapping.
Hadien ka jingpynmih ïa ka Draft Electoral Roll, ka jylla ka la ioh pdiang 17,061 tylli ki application, kiba kynthup ïa 9,343 tylli ki Form 6 ban pynrung kyrteng, 1,076 tylli ki Form 7, bad 6,642 tylli ki Form 8 kiba ïadei bad ka jingpynkynriah bad pynbeit ïa ki jingtip.
U Tiwari u la kyntu ïa ki nongthep vote kiba dei hynrei kim shem ïa ka kyrteng jong ki ha ka Draft Roll ba kin thep ïa ka Form 6 ryngkat ka declaration shuwa ka 18 tarik, Nailur.
U la pyntip ruh ba ki seng saiñpyrthei ki la thung 1,814 ngut ki Booth Level Agents ban ïarap ïa ki nongthep vote.
Ka NPP ka la thung 736 ngut, BJP 393, VPP 320, INC 186, UDP 121 bad AITC 58 ngut.
U CEO u la ong ba ka thong jong ka SIR ka long ban pynthikna ba “ym don u nongshong shnong uba bit ban shah ieh shabar bad ym don ruh u briew u bym dei ba un shah pynrung kyrteng.”
Shuh shuh la pyntip ba ka jingpynbeit ïa ki claims bad objections bad ki hearing kan bteng haduh 17 tarik, Risaw, katba ka Final Electoral Roll yn pynmih ha ka 21 tarik, Risaw 2026.