Kat haduh mynta mynne ym pat don jingpyntip na Delhi ban pynïasoh ki 8 ngut ki MLA ka UDP sha ka BJP

Shillong, Nailur 15: U State President ka BJP, u Rikman G Momin, u la ong ba ki nongialam ba rangbah na Delhi kin sa rai ïa u kyrtong ban ïakhun ïa ka elekshon shiteng samoi sha Shillong Lok Sabha bad halor ka jingpynbna jong ki 8 ngut ki MLA ka UDP ban pyniasoh sha ka BJP.
U Momin u la ong ba ka state unit ka la pynpoi ïa ka thup jong ki briew kiba kwah ban ïakhun ïa ka Shillong seat sha ki nongialam ba rangbah ka party ha Delhi.
“Yn sa rai da ki nongialam ba rangbah na Delhi.Ki kyrteng ki la don, ngi don baroh 9 tylli ki kyrteng, ngi la dep khot ïa ki aplikeshon bad ngi la dep ban ai sha Delhi, ka sorkar kmie kan sa shim ïa ka rai”, u la ong.
U State President ka BJP u la ong ba kam shym pat la don kano kano ka jingpyntip kaba thikna na ki nongialam ba rangbah na Delhi ha kaba ïadei bad ki MLA ka UDP ban pyniasoh sha ka party.
“Em, ngim pat pynbeit.Ngim tip la ki kloi ne em ban ïasoh.Ki lah ban don ka jingiakren bad ki nongialam ba rangbah jong ka party.Kumta mynta ngim pat don kano kano ka jingpyntip na ki nongialam na Delhi”, la ong u Momin.