SHILLONG, Nailur 16: Ka Nongkrem SC ka la sdang ïa ka jingïalehkai ba nyngkong jong ka Group A ha ka lympung Shillong Sports Association First Division Football league 2026, da ka jingjop pyrshah ïa ka Malki SC hynne ka sngi Balang ha madan First Ground-SSA Stadium, Polo.
Haba phai sha ka jingïakhun, ka Nongkrem ka la hap ban wanphai na ka shi kol hadien ba ka Malki ka la ïoh ban pynkhihjar nyngkong lyngba u Rangdajied Rynjah (75’) shuwa ba kan jubab lyngba ki kol u Donboklang Kharjana (78’) bad u Aiboklang Nongrum (87’) ban jop ïa ka jingïalehkai da 2-1.
Ka SSA 1st Division 2026 ka don 10 tylli ki kynhun ba ïashim bynta, bad la phiah ïa ki ha ki ar tylli ki Group (A & B) kaba mar san tyli ki kynhun ne klob. Kawei pa kawei ka kynhun kan ïakhun shi sien ïa kawei pat kaba don ha kajuh ka Group, bad ki ar tylli ki kynhun ba pyndep ha khlieh duh na kawei pa kawei jong kine ki ar tylli ki Group kin ïohrung sha ka Semifinal.
Ki ar tylli ki kynhun ba poi sha ka Semi final kin shah kyntiew kyrdan sha ka Shillong Premier League na ka bynta u snem 2027, nangta kin ïoh ruh ban ïashim bynta ha ka SSA Champions Cup 2026.
Kin don ruh ki jingïakhun ban lait shah pynhiar kyrdan (bottom league) na ka bynta ki ar tylli ki klob ba wan sha trai duh na kawei pa kawei na kine ki ar tylli ki Group, ha kaba kin ïakhun mar shisien kawei ïa kawei pat, nangta ki ar tylli ki kynhun kiba pyndep sha trai duh kin shah pynhiar kyrdan sha ka Second Division na ka bynta u snem 2027.
Ka jingïalehkai SSA 1st Division 2026 ha kane ka sngi Palei (17.09.2026) ka long hapdeng ka Laitkyrhong SC pyrshah ïa ka Mawtawar SC (Group A) ha SSA Ground ha ka por 12:15 baje mynsngi.
