Jowai, Nailur 15: Ka ‘Kiang Nangbah Government College’, Jowai mynta ka sngi kala rakhe ïa ka “60th Foundation Day” ha ka jingïalang ba la pynlong ha Auditorium jong katei hi ka College, ha kaba u V.K. Mantri, IAS, Commissioner & Secretary, ka tnad pule puthi jong ka sorkar jylla ula long kum u kongsan.
Ha kane ka sngi la wan ban donlang naduh ka District School Education Officer WJHD ka Dr. Wa-i-sa Sumer, ki ophisar sorkar, ki nonghikai, ki samla pule nalor kiwei de.
Na ka liang u Principal jong ka Collage ma H. Toi haba ai jingkren shaphang ka jingïaid lynti jong ka College ula ong mynta ka jingdon ki samla pule kala kynjoh sha ka 3,309 ngut, 129 ngut ki nonghikai bad 80 ngut ki Non Teaching Staff.
Ïa kane ka jaka pule (Collage) la seng ïa ka naduh ka 15 tarik u Nailur, 1967 haka por jong ka sorkar Assam ha ryngkat ki katto katne ki Subject lem bad ki nonghikai da kaba sdang ïa ka ha ka kyrteng ka ‘Jowai Night College’ bad haka snem 1971 ka tip kum ka Jowai Govt. College, haka snem 1981 la pynkynriah ïa ka na Iongpiah sha ka jaka ba pura bad haka snem 1983 la ai kyrteng ïa ka da kaba ai burom ïa uwei na ki Khlawait ka Ri-Lum Jaiñtia u “Kiang Nangbah” Govt. College.
Shuh shuh ula ïathuh katba nangïaid ki snem ïa ki Subject pule la nang pynbuh haka degree level naduh ka Arts, Science bad Commerce, Kumta haka snem 2021 lyngba ka jingtrei shitom jong ki nonghikai (Lecturer) bad ki samla pule la ithuh (Accredited) ïa ka College lyngba ka NAAC haka (Grade-B) bad kala long ka College ba nyngkong ba ïoh ïa ka jingithuh hapoh ka jylla bad ka College kala nang kylla katkum ka juk ba mynta kynthup ïa ki jingtei ba bun bad ka College ha u snem 2023 kala sdang ïa ka rukom treikam katkum ka NEP-2020.
Kumba ka long mynta ka College kala don ruh ïa ka lad pule ‘Vocation Training Course’ haduh 15 tylli da ka jingïatreilang, kyrmen ha ki snem ban wan kin dang mih shuh shuh, la sdang ruh ïa ka Course Four-Year ‘Integrated Teacher Education Programme’ ITEP, ka College kala ïoh jingïarap ruh naka Rashtriya Uchchatar Shiksha Abhiyan (RUSA). Lyngba kane ka jaka pule (College) sorkar hapoh ka Ri-Lum Jaiñtia kala ai jingshakri haka liang ka jingnang jingstad bad saiñ dur ïa ka lawei ki samla pule.
Na ka liang u V.K. Mantri, IAS ula ïaroh ïa kane ka jaka pule kaba la paw bha hapoh ka Ri-Lum Jaiñtia bad ka liang jong u ruh ula kular ban ïarap katba lah ïa ki kam kiba ïadei bad ka jingdonkam jong ka College.
Ula ong la donkam ïa ka College ban ïoh noh da kaba thymmai ïa ka Auditorium namar kumba long mynta kaba don hapdeng ka jingjot jingpar, kum ka College kaba la kynjoh 60 snem ka rta kala dei ka por ban ïoh ïaka mon laidluid halade hi ban thaw ïa ki lad jinghikai katkum ka juk, khnang ban saiñ dur ïa ka pule puthi kum ka University. Ula pyntip ruh ba ka sorkar hashwa ka Christmas kan pyllait ïa ka Umbrella Scholarship jong ka 2-Installment na ka bynta ki samla pule.
Ha kane ka sngi la ai khusnam ruh sha ki nonghikai (lecturer), Kymjuh ruh ïa ki samla pule kiba la ïoh Toppers. La pynshong shongshit shuh shuh ïa kane ka sngi da ki jingrwai bad ka jingshad tynrai na ki samla pule ka College.
La pynkut ïa ka prokram da ka jingrwai National Anthem bala lam khmat da ka NSS jong ka College da ka jingïashim bynta lang da baroh, katba ïa ka jingïalang la pynïaid da ka S.M.F Blah bad ïa ki kyntien ai khublei la ïoh na ka kong V. S. Syiem.
