Ban kyrshan pisa ïa ki samla pule yn pynlong ka WJSU ïa ka Follow-up Examination 2026

Jowai, Nailur 10: Ka War Jaiñtia Students’ Union (WJSU) kala pyntip ba ka Education Sub-Committee jong ka seng kan pynlong ïa ka Follow-up Examination 2026 jong ki Top-20 na ka bynta ka 2nd Warjaiñtia Scholarship Examination 2025 kaba dang shuh dep ban pynlong ha une u snem bala dep 2025.
Ïa ka Follow-up Examination 2026 jong ka 2nd Warjaiñtia Scholarship Examination 2025 kan long haka 3rd October 2026, ha Riwar Jaiñtia Church of God School, Ladjaplem, haka por 9 baje mynstep haduh 3 baje janmiet.
La kyntu ïa ki khynnah skul kiba poi sha ka kyrdan Top 20 naduh ka Section I, Section II, Section III, kiba don haka list jong ka 2nd Warjaiñtia Scholarship Examination 2025, ba kin sngewbha ba long kiba la pynkhreh ban shim bynta ïa kane kabu ksiar kiba ka seng kala shim ïa ka sien jam.
Ïa kane ka Top 20 Follow-up Examination 2026 kiba lehbha bad kiba pass bha 7 ngut na kawei ka Section I, Section II, Section III, ka seng kan ai Rs 1200/- u wei khynnah skul na ka bynta 12 bnai lynter (Monthly Scholarship) kum ka jingpynshlur bad ai mynsiem ban ïarap tynronglang ïa ka jinglut jingsep haka pule ka puthi, la kyntu ruh ban kin minot bad trei shitom ban poi sha ka thong jong ka jingim, khamtam eh ïa ki khynnah kiba wan na ka longïing kiba duna ka ïoh ka kot kiba duk bad rangli, khnang ba kin jop ha ka pule puthi.
Ka seng ka kyrpang ïa ki kmie ki kpa, ki Nonghikai napoh ka thaiñ Warjaintia, Amlarem Civil Sub Division, ba kin sngewbha ban synran lem bad ïalam ïa ki khynnah skul kiba shim bynta ha kane Top 20 follow up jong ka 2nd Warjaiñtia Scholarship Examination 2025.
Ki khynnah kiba shah jied haka Top-20 Follow-up Examination 2026 jong ka 2nd Warjaiñtia Scholarship Examination ki dei ban poi 30 minit thik hashwa ban sdang ka exam bad ki dei ban rah lang ïa ka Admin Card jong ka exam 2025 lane ka skul ID Card.
Ka Education Sub-Committee ka Seng ka pyntip ruh hadien ka Written Examination kan sa pynkhreh ruh ïa ka Personal Interview ïa ki khynnah skul jong ka Section I, Section II, Section III, haka por 1:00 PM haduh 3 PM kum shi bynta ba pynmliem ba kin proh ka jabieng bad kin longshlur ha ki Personal Interview jong ki.
Ka seng ka kyrmen lynba kane ka Exam yn budien ïa ki khynnah skul kiba wan sha khmat jong ka 2nd Warjaiñtia Scholarship Examination 2025.
Na ka bynta ka jingtip kham bniah ki lah ban phone sha u Education Secretary u Heartcasing Dkhar, ha u No Phone: 9366081154.