Nongstoiñ, Nailur 10: Ka kur Ïawren bad Ïawlar kiba na ki lai kpoh kiba kynthup ïa ka Ïawren Rum, Ïawren Neng bad Ïawlar, hapoh ka jingïalam jong ka kong Usefull Mary Ïawren Secretary ka Kur ki Laikpoh, ha ka sngi palei jong ka taiew 10 tarik Nailur 2026, ki la ïa mih paidbah naduh ki khynnah, samla bad tymmen ban leit pynkhuid ïa ka jaka pynïeng Kali kaba don marjan bad ka kshaid Weinia bad sha ki sawdong sawkun jong ka.
Ha kane ka sngi la don ryngkat ruh da ki rangbah Kur ba kynthup ïa u bah Nicholas Ïawren, bah William Ïawren bad kiwei kiwei ryngkat ki para kur baroh, kiba la tuid la kumba spah ngut ei ei sha katei ka jaka.
U bah Nicholas Ïawren rangbah Kur haba ïakren bad u nongthoh khubor, u la ong jan baroh kawei ka khyndew kur haduh mynta mynne ym pat ïasam bynta ïano ïano ruh. Hynrei ka dang dei beit ka nongkynti jong ka kur ki lai kpoh baroh kawei bad ban kam kynti da mano re mano na u riew shimet, ka kur hi baroh kawei kan ym shah satia.
U la ong shuh shuh ba lada ka dei ban ïasam bynta noh ruh, pynban ïa ki jaka ba don ki jaka jngohkai kiba paw bad kiba itynnad yn sah beit jong ka kur ym jong uno uno ne kano kano ka riew shimet.
Na ka liang u bah Nicholas u la ong ruh ba ka don ka jingbym ïasngewthuh jingmut na ki katto katne ngut. Hynrei kum ki rangbah kur kin sa la lum lang ban khroh ban ïa pynbeit lang da ka jingïatylli namar ka dei tang ka kam ïing kam sem ki shipara.
Ha kaba ïadei bad kane ka sngi ba kyrpang jong ka Kur, na ka liang u rangbah Kur kata u Bah William Ïawren u la pynpaw ba kane ka jingmih paidbah ryntih shriak jong ka kur ka pyni ïa ka jinglong shi tylli bad ka jingthmu ka long ban pynitynnad shuh shuh ïa kane ka jaka. Namar lyngba ka khuid ka suba, ka lah ruh ban khring ïa ki nongwan jngohkai pyrthei ba kin muja ïa ka jingitynnad jong ka mei mariang.
Nalor nangta u la pynpaw ba ka jingthmu jong ka jingmih paidbah ban pynkhuid, ka long ruh ka daw ba ka kur kam don pisa ban phah pynkhuid ha kiwei pat. Kumta da ka jingïa mynjur lang jong ka Dorbar Bah la shim ïa katei ka rai ban pynlong ïa ka jingleit pynkhuid ïa ki katto katne ki bynta jong katei ka jaka kaba don ruh ïa ka Kshaid kaba itynnad.
