17 ngut ki nongwei lap ka ïingbishar High Court ba la set palat pud ha phatok Shillong

Shillong, Nailur 10: Ha ka jingleit jurip jong ki bor ka ïing Bishar High Court ïa ka Phatok ha Shillong ha ka sngi Balang ka la lap ba ki don 17 ngut ki briew kiba nabar ri kiba dang shah set ha phatok wat haba ki la pyndep ïa ka jingshah pynsajia, kaba long mar khongpong bad ka jingkam ka sorkar ba kala don tang kawei kum katei ka jingjia.
Ka Division Bench jongka Chief Justice Revati Mohite Dere bad Justice W Diengdoh ha ka sngi Baar ki la ïoh ïa ka jingpyntip na u Additional Advocate General K Khan, halor ki jingbthah lyngba ka shithi ha ka 28 tarik u Nailar 2026, ba tang uwei u briew uba na Bangladesh ula don ha phatok lah palat ïa ka 1 snem hadien ba ula pyndep ïa ka jingshah pynsajia.
Ha katei ka jingjurip ha ka Sngi Balang ban khmih bniah ïa ka jinglong jingman jong ka phatok bad ïa ki lad jingïarap ha kaba ïadei bad ka aiñ kanun, ka Bench ka la lap ba ki don 15 ngut ki nong Bangladesh, uwei na Myanmar bad uwei na Nigerian kiba dang shah set hapoh phatok.
Ka ïing Bishar ka la pynpaw ba u briew uba na Myanmar ula shah set hapoh phatok lah palat ïa ka 10 snem hadien ba u lah pyndep ïa ka jingshah pynsajia, katba uba na Bangladesh ula shah set la palat ïa ka 4 snem palat ïa ka por kaba dei ban set phatok ïa u.
Kiwei kiwei kila shah set phatok palat ïa ka 6 bnai haduh katto katne snem.Ka ïing Bishar ka la shim ba ki jingtip kiba la ai da u AAG ki dei “Kiba la ïalam bakla lut bad ki bym dei”. Ka iingbishar kala bishar ïa ka suo motu PIL, WP(C) No. 91/2026.
Ka Amicus Curiae ka T Yangi B ka la aiti ruh ba ka la lap ïa ki 4 ngut kiba shah set phatok ha Williamnagar, 3 ngut ha Tura bad 4 ngut ha Nongpoh kila pyndep ïa ka jingshah pynsajia, watla ym pat lah pynshisha la ki dei ki nong India ne ki dei kiba nabar ri.
U Inspector General of Prisons, uba la don lang hapoh ka ïing Bishar ula pyntip ba ka jylla kam don ïa ka Detention Centre ban buh ïa ki briew kiba nabar ri hadien ba ki lah pyndep ïa ka jingshah pynsajia tad haduh ban da phah leit phai noh na ka jaka kaba ki wan.
Haba shim ba ka jingset sah palat ïa ka por jongka jingshah pynsajia ka long kaba be-aiñ¨ bad ka jingpynkheiñ ïa ka Article 21, ka ïing Bishar kala ong ba ïa baroh kitei ki briew kiba nabar ri lah dei pynkynriah noh sha ki Detention Centre kumba la bthah da ka aiñ¨.
Ka ïing Bishar ka la bthah ïa u Commissioner and Secretary, Home (Police), Commissioner and Secretary, Prisons and Correctional Services, IG Prisons bad ki heh ophisar jongka Foreigners Registration Office (FRO), Shillong ba ki dei ban wan mih dalade ha ka 10 tarik u Nailur.
Ka la pan ruh ïa ka jingai jingbatai kumno ban buh ïa ka jaka ka ban long ka Detention Centre bad ong, ba kan pdiang ïa ka jingsiew ïa ka bai lutksan na ka bynta kito kiba la shah set ha phatok palat ïa ka por ba ki dei ban shah pynsajia.
Kala kdew shuh shuh ba kan sa pynmih ïa ka hukum kaba biang ha ka sngi palei halor ka jingaiti ïa ki jingtip kiba thok ba shukor ïa ka ïing Bishar.