Shillong, K’Lyngkot, 10: U Myntri Rangbah ka Jylla, Conrad K Sangma ha ka sngi Thohdieng u la ong ba ka sorkar jylla ka dang hap ban bishar bniah bha shwa haba ïadei bad ka jingdawa ai distrik ha Sohra.
“Ha,oid, ka don ka jingdawa na kiba bun kumba ka Sohra ka dawa kumjuh ruh na Dadenggre bad kiwei kiwei pat ban ai distrik. Hynrei nga kwah ban ong ba watla kadei ka thong jong ka sorkar ban jan sha ki paidbah hynrei ki don bun pat ki jingeh khamtam ha jinglong jong ka jaka. Kumta ngi hap ban peit bad bishar bniah jinglong ka jaka kumjuh ki jingeh ha ka pla tyngka,” ong u Myntri Rangbah haba kren bad ki lad pathai khubor hadien ka jingïalang jong ka kynhun Myntri kaba long ha Sohra.
Nangta u ong ruh ba ïa mynta hi um pat kwah satia ban ong ei ei bad um kwah ruh ban kular namar na ka liang ka sorkar ruh ka dang hap ban bishar bniah.
Lah ban kdew hangne ka la mih ka jingdawa kaba jur bha na ki paidbah jong ka thaiñ Sohra ha shwa ka elekshon MLA 2023 na ka bynta ban kyntiew kyrdan noh ïa ka Sohra Civil Sub Division.
Hynrei na ka liang u Myntri Rangbah naduh katei ka por u la pynpaw ba kum ka sorkar kim pat lah satia ban kular namar ki dang hap ban bishar bniah halor kiba bun ki bynta.
