Shillong, Nohprah 01: Ka kynhun ïalehkai ba la rangbah bha – kata kiba la 60 snem shaneng jong ka Meghalaya ki la ïoh khur lai tylli ki takma ksiar, ar tylli ki takma rupa bad kawei ka takma rnong ha ka lympung ïalehkai North East Masters Table Tennis Tournament 2024 ha Kohima, kaba la pynkut noh hynnin ka sngi Saitjaiñ.
Kane ka lympung kaba lai sngi lynter la sdang naduh ka sngi Palei bad ka kynhun kiba la 60 snem shaneng jong ka Meghalaya ka la mad ïa ka jingïaid lynti kaba seisoh tam, naba kam pat ju ïoh ïa ka lad ban khur takma kham bun, khamtam ki takma ksiar.
Hadien ba sdang ïa ka lynti ïaid kaba seisoh, ka kynhun ïalehkai jong ka Meghalaya ba kynthup ïa u Santanu Ghosh, H Singha bad u RB Das , nyngkong ki la lah ban pynliem ïa ka Arunachal Pradesh da 3-1 kol, nangta ïa ka Nagaland da 3-0 ban ïohrung sha ka semifinal, ha kaba ka la pynliem noh ïa ka Manipur da 3-0.
Ha ka final ka Meghalaya ka la jop ïa ka jingïalehkai kynhun (Team Event), ha kaba ka la pynliem noh ïa ka Mizoram da 3-1.
Ka jingïakhun final jong ka kyrdan shijur ki shynrang (men’s double) ka la long hapdeng ki nongïalehkai ka Meghalaya, ha kaba ki arngut u Santanu Ghosh bad u RB Das ki la jop pyrshah ïa u AG West bad u Harendra Singha. Ha ka jingïakhun para marwei ruh ka la long hapdeng ki nongïalehkai ka jylla, ha kaba u Ghosh u la pynliem ïa u Singha.
Ka takma rnong ka la wan ha ka jingïalehkai mixed double, ha kaba u Ghosh u la ïatreilang bad ka Shyamali Banik na Tripura.
Haba phai pat sha ka kynhun ïalehkai kiba la 50 snem shajrong (50-year-plus) jong ka Meghalaya kam shym la lah ban poi sha ka semifinal naba shah rem noh da 3-0 ha baroh ar tylli ki jingïalehkai pyrshah ïa ka Nagaland bad Assam.
