Khliehriat, Nohprah 01: U Symbud myntri rangbah jong ka Jylla, u Bah Sñiawbhalang Dhar ha ka sngi Saitjaiñ kum u kongsan ha ka jingpynhap lama ïa ka 30th Gold Cup Knockout football tournament jong ka Wapungskur Sport and Social Welfare Organisation kaba dei ruh ka Football Club, u la kular ban nohsyniang T20 lak tyngka kum ka jingïarap na ka bynta ban shna ïa ka jaka khreh ki rang ïalehkai lane ka dressing room.
Kiba la ïa don ryngkat ha katei ka sngi ki kynthup ruh u MDC uba dei ruh u dkhot Executive Member jong ka Jaiñtia Hills Autonomous District Council, u bah Phasmon Dkhar, kum u symbud kongsan bad u la kular bna ban iarap ïa kane ka Club kaba deibruh ka WDSWO, da ka madan Artificial Turf kata ha ryngkat ka jingiatreilang bad u Bah Sñiawbhalang Dhar.
Kiba la ïa don lang ha katei ka sngi ki kynthup ruh u Deputy Commissioner ka East Jaiñtia Hills District, u Shivansh Awasthi, IAS, u Superintendent of Police East Jaiñtia Hills District, u Giri Prasad, IPS bad kiwei kiwei ki riew rangbah jong ka thaiñ.
Ha ka jingïakhun ïa ka final jong katei ka kaba itynnad kaba ïaryngkat bor bha jong ka 30th Gold Cup Knockout football tournament jong ka Wapungskur Sport and Social Welfare Organisation, ïa ka nam lahduh la ïoh rah da ka Rymbai Skhenshynriah SC kaba la rah ruh ïa ka song pisa kaba T 5 lak tyngka ryngkat bad ka ksiar kaba shiteng tola hadien ba ka la pynliem noh ïa ka Kynsai Stream Fensing FT da 2-0 kol.
Ka kynhun jong ka Kynsai Stream Fensing FT kaba la shah pynliem da 2-0 kol ka la ïoh rah ïa ka khung pisa kaba T 3 lak tyngka.
Kum ka jingpynkynmaw ka Rymbai Skhenshynriah FC ka la ïoh rah ïa nam lahduh haduh lai sien kynthih ha kane ka Gold Cup Knockout Football tournament.
