Bun na ki paidbah ha kine ki sngi ki la hap ban pynïeng ïa la ki jong ki kali ha ki rud surok, ki la don ruh kiba la shu pynïeng wat ha ki jaka ki bym shah ban pynïeng kali.
La shem ruh ba ha kine ki sngi ka long shisha kaba eh ban ïoh ban pynïeng kali ha ki thaiñ Motphran, Khyndailad bad katto katne ki jaka ba long ïew khamtam eh lad ki kwah ban leit thied jingthied.
Kumban shu ong noh ka jaka pynïeng kali kaba la shah pynpra noh kaba don ha Motphran kane ruh haduh mynta kam pat idon jingkyrmen satia sa haduh katno snem yn lah ban ïohi ïa ka jaka pynïeng kali ha katei ka jaka kaba thymmai.
Lah ban ong ba lada kane ka jinglong jingman kan ïaineh sah kumne ka jingeh jong ka jingkhapngiah kan nangkiew nangkiew bad nangjur manla ka sngi namar tang ka jingkiew kiba don ki kali ka la nangkiew.
Kumba la ïathuh ha ki por ba long dorbar Assembly la ïathuh ba hapoh ka tnat District Transport Officer (DTO), kim duna ïa ka 25 hajar tylli eiei ki kali kiba la wan ban register thymmai hapoh kane ka Ophis.
Ka jingkhapngiah ka Nongbah Shillong ruh kam dei tang da ka jingdon ki kali ba napoh ka Nongbah hynrei la ïohi ba na baroh ki district ki kali ki wan beit sha Shillong ha kaba kane ka la nang pyndap shuh shuh ïa ka jingkhapngiah bad dheng kali ruh kaba manla ka sngi.
Kumba la ïohi ha Nongbah Shillong ki la don tang kumba 4 ne 5 tylli ki jaka pynïeng kali kiba ka Meghalaya Urban Development Authority (MUDA) kiba don ha Nongbah Shillong bad kine ruh mynta kim lah shuh ban pynbiang jaka ïabaroh ki kali kiba don ha Nongbah Shillong bad kumjuh ruh na ka bynta kito kiba wan na kiwei pat ki District.
Lehse kine ki jaka pynïeng kali jong ka MUDA ki lah ne ki don ïa ka capacity kaba long tang kumba 2 ne haduh 3 spah eiei ki kali kiba lah ban pynïeng ha kine ki kali bad kumno yn lah ban pyndap ïa ka jingdon jong ki hajar tylli ki kali kiba ïaid manla ka sngi hapoh ka Nongbah Shillong khamtam mynta lei ym tang ki 4 shaka hynrei la ïohi ba la nang roi sa ki 2 shaka.
Lah ban ong ba ka jaka pynïeng kali jong ka MUDA kaba don ha Khyndailad ka la long kawei na ki jaka pynïeng kali kaba la khapngiah bha bad don kiba ïathuh ba lada kwah ban pynïeng kali ha katei ka jaka mynta ka lah shem shitom bha bad ki briew kiba kwah ban pynïeng kali ha katei ki la hap ap da u laiñ ban ïoh pynïeng ïa ki kali jong ki ha katei ka jaka, don ruh kiba ïathuh ba kin hap pynïaid pyllun pyllun katei ka jaka tang ban ïohi ïoh don ki kali kiba mih khnang ba kin ïoh ban pynïeng ïa la ki jong ki kali ha katei ka jaka, hynrei yn da ki la pynïaid ia la ki jong ki kali pyllun pyllun la bunsien hynrei watla katta ruh kim ïoh lad ban pynïeng ïa la ki jong ki kali bad bun ki la hap ban leit phai noh sha la ki jong ki ïing tang na ka daw ba kim ïoh ban pynïeng ïa ki kali khnang ba kin ïoh ban leit thied jingthied napoh ka Khyndailad.
Dei na kane ka daw ruh ba bun na ki briew ki la hap ban pynïeng ïa la ki jong ki kali harud surok bad dei na kane la ïohi ba shilynter ka surok jong ka Khyndailad la dap da ki kali baroh arliang, shiliang la pynïeng da ki Taxi Kamai ne ki stand taxi bad sha kawei pat la pynïeng ki kali shimet.
Kane ka jingpynïeng ha baroh arliang ka la nang pynrit shuh shuh ïa ka surok bad dei na kane pat ka daw ba la pynlong ïa ka jingdheng kali kaba jur manla ka sngi.
Kane ka bym biang ki jaka ïeng kali ka wanrah ïa ka jingeh ruh wat lada ka sorkar ka thmu ban pynheh ïa ka surok kaba ha Nongbah Shillong.
Katkum ki kyndon jong ka Meghalaya building bye laws ki dukan kiba heh ne ki commercial complex khamtam eh kiba don ha ka Nongbah Shillong kidei ban donlang bad ki jaka pynïeng kali, hynrei ym sngewthuh shuh balei ki dukan heh kim don ïa ki jaka ïeng kali bad ka lah ban don kaei re kaei kaba kitei ki dukan heh ki pynkheiñ ïa ki kyndon ka building bye laws bad ha kano ka rukom ba ki la ïoh ka jingbit ban pynïeng ïa ki dukan imat kam don hi ruh ka jingleit jurip ha shwa ba kin tei.
Wat na ka liang ki pulit pynïaid kali ruh ki ong ba ka jingïeng kali baroh arliang ka la ktah shisha, wat ïa ki ruh ban pynïaid ïa ki kali manla ka sngi namar bun ruh kiba shu ïa kwah ban shwa ïalade.
Ban ïarap ïa kane ka jingeh wat la dangshen u Myntri Rangbah haba ïakren bad ki lad pathai khubor u la ong ba ka sorkar hadien ba ka la pynkynriah ïa ki ophis sorkar sha Mawdiangdiang ne New Shillong Township ka sorkar kan thaw bun tylli ki jaka pynïeng kali ha kiba bun ki jaka bad u la urlong ruh pat ka sorkar jylla ka donkam ïa ka jingïatreilang jong baroh ban lah pynurlong ïa kane ka jingthmu.
Hynrei kumba lah bun tang ki jingkular jong ka sorkar jylla kiba haduh mynta babun kim pat urlong satia te sa kitei ki jaka pynïeng kali kiba thymmai haduh lano kin urlong.
