Ha kajuh ka sngi 10 klur pyllait skim u Bah Sanbor ïa ka Shillong South Constituency

Shillong, Nohprah, 01: U MLA ka Shillong South, Bah Sanbor Shullai ha ka sngi Saitjain u la pyllait paidbah bad buh mawnongrim na ka bynta bun tylli bha ki projek kam pynroi na ka bynta ka jingmyntoi ki paidbah jong ka Constituency khamtam eh haba ïadei bad ki lynti syngkien bad ka umbam umdih kiba la kot baroh haduh 10.22 klur tyngka.
Ïa kine ki projek baroh, u Bah Sanbor u la buh mawnongrim bad plie ha ryngkat ka jingdonlang ki nongïalam shnong jong ka Lumparing kumjuh jong ka Madan Laban. Kine ki skim ki kynthup ïa ka skim shna surok ha Wah Shyngiar Lumdorbar kaba long 1.38 klur tyngka, nangta ka surok kali ha Lumdorbar Upper Lumparing ha ka jinglut ba 3.02 klur tyngka bad ruh ka jingshna ïa ka nala iaid um kaba sdang na jaka pynlang um haduh ka iing sah jong i Kong Hasina Thabah ha ka jingmang ba 91 lak tyngka
Hadien kane u la leit ruh ban plie ïa ka jaka ai umbam kaba tip kum ka Greater Lumparing Additional Water Supply Scheme lyngba ka AMRUT Scheme bad na ka PHE/Municipal kaba la mang ha ka jinglut kaba 3.13 klur tyngka.
Bad khatduh eh la plie ïa ka surok ïaid kali ha madan laban kaba la pynïoh da ka jingsbun mynsiemki trai jaka da ka jingthrang ban ïoh surok. Ïa kane ka shna ha ka jinglut kaba kot sha ka 1.77 klur tyngka.
Ïa kane ka surok la lah ban shna da ka jingai sngewbha jong ki nongshong shnong ïa ki jaka kiba dei ban mait mar khyndiat na baroh arliang.
Kumta kum ka dak ka jingsngew burom ïa ka jingtrei borbah jong u MLA ban pynïoh ïa katei ka surok, ki nongshong shnong khamtam eh ki longkmie kiba la kham rangbah ki la pynlong ruh ka jingpynkup burom ïa u Bah Sanbor.
La donlang ruh ha kane ka sngi naduh ki nongïalam jong ki Dorbar Shnong, ki Ophisar na ki tnad ba dei peit ruh bad ruh an ka ophis treikam jong u Bah Sanbor kynthup naduh u Bah Wallam Khongwir bad Bah Mike Laso nalor kiwei kiwei.