Paw ka India kum ka nongïalam jong ka pyrthei ha ki kam ïatreilang

Ka kam cooperative ka dei kaba la paw namar ka jingkyntiew ïa ki briew kiba kwah ban kiew ha ka ïoh ka kot bad ruh namar ka jingwanrah ïa ki hapoh ki kam ka ïoh ka kot.
Ka kam cooperative ka don shibun ki lad kum ka bor jong ka jingkylla ban kyntiew ïa kito kiba duna pisa lane kiba don tang khyndiat ki jingkynshew. Ka India ka dang trei na ka bynta kane.
Watla ka ri jong ngi ka don ka nongrim kaba khlaiñ jong ki cooperative, ka rukom ha kaba ka kam ïatreilang ka la kylla sha ka lad na ka bynta ka jingkyntiew ïa ka ïoh ka kot shwa ban ïoh ka jinglaitluid jong ka ri la khyllie im biang da ka bor kaba thymmai ha ka samoi jong u Myntri Rangbah Duh, Narendra Modi. Ha u snem 2021, hapoh ka jingïalam jong u Myntri Rangbah Duh, Narendra Modi, ka Sorkar ka la shim ïa ka rai kaba heh ban plié lut ïa ki lad kiba la khang na ka bynta ka kam cooperative da kaba sdang ïa ka tnad kaba kyrpang na ka bynta ka jingïatreilang ha ka ri. Ki sienjam ba la shim ban pynkhlaiñ ïa kane ka kam ka la ai ïa ka India ha kine ki lai snem ïa ka jingkhreh ban paw kum ka ‘Vishwamitra’ ha ka kam cooperative ruh.
Namar kane, ki kam cooperative mynta ki don ha ka khep jong u mawmer ba kyrpang. Ka India ka la khreh ban pdiang ïa ka International Cooperative Alliance (ICA) General Assembly bad Global Cooperative Conference ha Delhi naduh ka 25 haduh 30 tarik u Naiwieng, 2024. Ha ka sien kaba nyngkong ha ka histori kaba 130 snem jong ka ICA, ka India kan pynlong ïa kane ka jingïalang. Kane ka prokram ka long kaba kongsan namar kan long ka dak jong ka jingwan jong ka United Nations International Year of Cooperatives 2025.
Ka jingpynlong ïa ka ICA General Assembly and Global Conference ha India ka dei ka dak jong ka jingithuh ha kylleng ka pyrthei ïa ka jinglong nongïalam ka ri ha ki kam cooperative.
Naduh ba la wan ka Sorkar BJP hapoh ka jingïalam jong u Myntri Rangbah Duh Narendra Modi, ki la don ki sienjam ban kyntiew ïa ki bynta kiba sahdien, kiba sahdien bha, kiba shem jingeh ha ka imlang sahlang. Ka Sorkar ka ngeit skhem ba kum kane ka jingkylla kam lah ban wan khlem da pynkhlaiñ ïa ka kam cooperative. Lah ban shu kdew hangne ba kane ka prokram ka ïahab bad ki sienjam jong ka India ban khyllie im ïa ki kam cooperative. La wanrah ïa ki jingpynkylla ha ka rukom pynïaid kam, ki polisi bad ki aiñ khnang ban khyllie im ïa ki kynhun cooperative kiba shem jingeh, pynïaid ryntih ïa ki kam jong ki, bad wanrah ka jingshai bad ka jingïakhun hapdeng ki cooperative society. Ka jingong u Myntri Rangbah Duh, ‘Sahakar se Samriddhi’ (Ka jingriewspah lyngba ka jingïatreilang), ka thmu ban pynlong ba ki kynhun cooperative jong ka ri ki long kiba lah ban kyrshan ïalade bad kiba khlaiñ. Da kaba pynïar ïa ka rynsan cooperative, la wahrah ïa kawei pat ka rukom treikam na ka bynta ka ïoh ka kot – kaba ïahab bad ka jingthmu jong u Myntri Rangbah Duh ban tei ïa ka ïoh ka kot jong ka India kaba kot sha ka $5. Kane ka rukom treikam kan ïarap ïa ka jingkiew shaphrang ka India bad kan long ruh kaba ai mynsiem ïa ka roi ka par jong kiwei kiwei ki ri.
Ka nongrim jong ka India ha kaba ïadei bad ka jingïatreilang ka dei naduh ki por hyndai, ha kaba ki tynrai ki don ha ki rukom treikam ha ka tynrai bad ka ïoh ka kot. Ki jingbatai ha ka Arthashastra jong u Kautilya ki pyni ïa ki jingïatreilang, kum ka jingtei ïa ki ïingmane bad ki dam na ka bynta ka bha ka miat ki paidbah ha ki shnong. Kumjuh, ki rukom treikam na ka bynta ka ïoh ka kot ha South India ki pyni ïa ki rukom ïatreilang. Bun ki riewstad ha ki kam ka ïoh ka kot kiba la ïoh jinghikai ha ka rukom pyrkhat jong ka thaiñ sepngi ki la sdang ïa ka jingïakren haba la sdang ki spah snem ba 21 ba ka jingïatreilang ka la kut ha kane ka juk mynta. Hynrei, nga ngeit skhem ba ki rukom treikam na ka bynta ka ïoh ka kot ba la sdang da ki ri bapher bapher kiba don 30 million, 50 million ne 100 million ngut ki briew kin ym ïahab bad ka ri kum ka India kaba don kumba 1.4 billion ngut ki briew. Khnang ban tei ïa ka ri kaba riewspah, ka long kaba donkam ban kyntiew ïa baroh ki dak jong ka jingkiew ka ïoh ka kot bad ruh ban pynthikna ka jingriewspah jong 1.4 billion ngut ki briew, ai kam ïa baroh bad pynthikna ba ki don ka lad ban don ka jingim kaba donburom. Bad kane ka lah ban urlong tang lyngba ka jingïatreilang. Ki don shibun ki nuksa ha ka histori jong ngi kiba pynskhem ïa kane ka jingngeit.
Ka Ahmedabad District Cooperative Bank, kum ban shu kdew, ka la ïohnong haduh T 100 klur ha ki shi spah snem. Kam don ki Non-Performing Asset (NPA), bad ki jingkynshew pisa jong ka ki tam ïa ka T 6,500 klur. Ka Amul ruh ka dei ka nuksa jong ka jingïatreilang. Mynta, 35 lak tylli ki longïing ki ïoh lad kamai jakpoh bad ka jingim kaba don burom lyngba ka Amul bad ki longkmie ha kine ki longïing ki don ka bynta kaba heh bad ki long ki nongïalam. Namar kane, ka jingdie mar ka Amul ha ka shi snem ka la kot sha ka T. 80,000 klur. Hap ruh ban kdew hangne ba kine ki longkmie kim shym la bei tyngka palat T. 100 haba sdang ïa ka kam.
Hapoh ka jingïalam jong u Myntri Rangbah Duh Narendra Modi, ka Sorkar ka la wanrah 60 tylli ki sienjam ban khyllie im bad pynkhlaiñ ïa ki kam ïatreilang ha India. Da ki snem ka jingiehbeiñ bad ki kynrum kynram ha ka rukom pynïaid kam ka la pyntlot ïa ka ïoh ka kot jong ki Primary Agricultural Credit Society (PACS). Ban pynbeit ïa kane, ka Sorkar ka la pynïar ïa ki lad jong ki PACS bad plié ïa ki lad ka ïoh ka kot jong ki. Lyngba ka jingpdiang ïa ki aiñ ba thymmai, ki PACS mynta ki lah ban trei ha 30 tylli ki kam, ba kynthup ki kam kiba ïadei bad ka dud, ka jingri dohkha, ka jingbuh ïa ki mar bam, bad ka jingpynïaid ïa ki Jan Aushadhi Kendra. Ka jingsdang ïa lai tylli ki national-level multi-state cooperative society ba thymmai ka la kyntiew ïa ki kam ïatreilang. Ka National Cooperative Exports Limited ka la plié ïa ki lad sha ki ïew ha kylleng ka pyrthei na ka bynta ki nongrep katba ka National Cooperative Organics Limited ka ai ka rynsan ban ïoh ïa ki syrnot organic bad ki ïew na ka bynta ki mar organic.
Ka Bharatiya Beej Sahakari Samiti Limited ka la pynthikna ïa ka jingïoh ki nongrep ïa ki symbai ba bha. Shuh shuh, ki sienjam ka Sorkar kum ka jingai jingïarap pisa, ka jingpynduna ïa ki khajna, bad ka kam khleh ethanol ki la khyllie im ïa ki kam ïatreilang ban pynmih shihi. Ban pynkhlain ïa ka jingïatreilang ha ki kam bank, la ban jur halor ka jingpynïaid ïa ki pisa jong ki kam ïatreilang sha ki cooperative bank. Ki sienjam ban kyntiew ïa ka jingshai, kum ka jingsdang ïa ka National Cooperative Database, ka la pynïaid ryntih ïa ki kam bad ka la pynïar ïa ki kam ïatreilang sha ki jaka ba dang sahdien. Shuh shuh, dang wanrah ïa ka National Cooperative Policy ban wanrah ïa ka rukom treikam kaba khlaiñ ban kyntiew ïa kane ka kam.
Ka ICA General Assembly and Global Conference 2024 kan long ka rynsan ban pyni ïa ka jingjam shaphrang ka India ha ka jingai bynta ïa baroh ha ki kam ka ïoh ka kot, ka jingweng ïa ka jingduk, ka jingpynthikna ïa ka jingryntih kyrdan ki shynrang bad kynthei, bad ka jingdon bynta ha ka jingpynurlong ïa ki thong United Nations Sustainable Development Goal (SDG) lyngba ki kam ïatreilang kiba khlaiñ. Ka kam kaba kongsan jong kane ka jingïalang ka dei ban tei ïa ka jinglong jingman kaba khlaiñ kaba plié lad ïa ki cooperative ba kin pynbeit ïa ki jingeh kiba thymmai bad shim ïa ki lad kiba thymmai. Ka long kaba donkam bha ïa ki cooperative ha kylleng ka pyrthei ba kin ïatylli lang bad noh synniang sha ka jingtei ïa ka lawei kaba kham bha bad kaba kham ïaineh ïa baroh.
Katba ngi pynkhreh ïa ka jingpynlong ïa kane ka prokram, nga khot sngewbha ïa baroh ki nongïalam ha ki kam ïatreilang, ki nongthaw polisi bad kito kiba trei na ka bynta ka jingkyntiew ïa ki briew ha kylleng ka pyrthei. Lyngba ka jingïatreilang, to ngin pdiang ïa ka jingïoh jinghikai, ka jingïasam bad ka jingïatreilang ban pynkhlaiñ ïa ka kam cooperative ha ka pyrthei. Ka jingkut jingmut ka India na ka bynta ka “Sahakar Se Samriddhi” kam dei tang ka jingthmu hynrei ka dei ka jingkular ba kyntang ban tei ïa ka lawei kaba skhem ha ka jingriewspah lang, ka jingïaineh bad ka jingkiew lang shaphrang.