Nongstoiñ, Naiwieng, 27: Ki katto katne ngut ki riew pawkhmat na ka shnong Mawïamsyiem kawei na ki shnong ha ka thaiñ Langpih kaba dang hap hapoh ka Hima Nongmynsaw Syiemship, mynta ka sngi ki la leit ban ujor sha ka ophis u Deputy Commissioner ka West Khasi Hills District, ban wad jingtip haba ïadei bad ka jingmih ki kynrum kynram ha ka kam synshar shnong synshar thaw.
Kitei ki briew kiba la don shi kynhun bad kiba bun kiba dei da ki longkmie da ka jinglamkhmat u bah Suwonroy Synchiang dkhot EC jong ka shnong Mawïamsyiem, ha ka jingïakren bad u nongthoh khubor ki la pynpaw ka jingsngew lyngngoh bad ki la ong ba u syiem ka Hima Nongmynsaw Syiemship u la thung Sordar da uwei ha ka shnong Mawïamsyiem khlem ka jingtip jong ki paidbah.
Ym tang katta hynrei ki la kynnoh shuh shuh ba u syiem u la pynkha shnong kaba la tip kyrteng kum ka Krongsyiem bad la thung sordar ïa u Martius G Sangma. Hynrei kaba sngew thamula ka long ba utei u ba la shah thung sordar u ba la don lang ruh ha kane ka sngi, u la ïathuh ba um don jingtip ei ei ba u la shah thung kum u sordar ka shnong Krongsyiem bad u wan lang bad kitei ki longkmie sha ophis u Deputy Comissioner.
Na ka liang u bah Passtar Nongshillong sordar ka shnong Mawïamsyiem ruh u la synranlang ïa katei ka kynhun bad u la ong ba kaei kaba la leh da ka ophis u Syiem, ka long ka bym lah ban pdiang bad dang myn ha ka sngi thohdieng jong ka taïew ruh ki paid nongshong shnong ka Mawïamsyiem, ki la leit ban pan jingshai na u syiem ka Hima Nongmynsaw Syiemship bad ka la don ka jingïather ktien kaba jur hapdeng ki paidbah bad u syiem Phlowel Syiem.
