Shillong Naiwieng 10: Mar ïa sdang ka jingwan jong ka aiom tlang ka kam khaïi bad thang rnga ha kane ka jylla ka la ïaibteng biang manla ka sngi wat hapdeng ka jingkhang ka Ïingbishar ïa ka jingpom dieng pathar ha kane ka jylla.
Ka kam khaïi rnga wat la ka kham duna ha ka por lyuir hynrei tang mar shu sdang kane ka aïom tlang kane ka kam khaïi ka la thnam biang ha kaba la ïohi ba ym tang sha ki thaiñ West Khasi Hills District jong ka jylla Meghalaya kaba la ju bna nam bha ïa kane ka kam khaïi bad thang rnga, hynrei ha kine ki sngi wat sha ki jaka khappud jong ka thaiñ Ri Bhoi district ruh kane ka kam khaïi rnga ka la ïeng rasong bha.
Ïa kane la shem ha ka jingleit jurip jong u nongthoh khubor ha kaba la lap ba bun tylli ki shnong kane ka thaiñ kiba la sdang mynta ïa kane ka kam khaïi.
Haoid ym lah ban len ba ki briew kiba leh ïa kane ka kam khaïi ki la leh da ka jingbym banse na ka bynta ki lad kamai jakpoh bad ban bsa ban pyndap ïa la ki jong ki ïing ki sem naba ym don pat da kawei pat ka kam ba kin trei.
Haba ïoh ïa kren bad katto katne ki nongkhaïi rnga sha kane ka thaiñ khappud jong ka Ri Bhoi district ki bym kwah ban pynpaw kyrteng ki la kubur ba kane ka kam khaïi rnga kaba ki leh manla ka sngi kadei shisha ka kam kaba beaiñ bad kaba la shah khang ha ka Ïingkashari hynrei ki la pat ba kim don lad da kumwei pat namar ka sorkar ruh kam don ki rukom treikam ne ki policy ban ai kam ïa ki khnang ba kin lah ban seng pat da kiwei ki kam lajong kiba ïahab bad kane ka thaiñ.
Ki la ong ba lada khaïi jhur ruh ka long kaba eh ba kin pynïaid ïew, lada ki treikam mistri ruh mynta ka kam ka la duna naba tang kiba heh spah ki ïohlad ban trei ïa ki kam jingtei jong ka sorkar ynnai ïakren lei bad ki kam jingtei shimet naba ka dor ka la heh lypa, kumta ki shim noh da kane ka kam khaïi rnga kaba ki nongthied ki wan hi sha ki jaka ban thied ïa une u rnga.
Kumta ha kaba ïadei bad kane ki la kyntu ïa ka sorkar ba kan ym dei ban pynlut kai ïa ka pisa ba ka la shim da ka ram ha ki kam tulop ïa ki nongtrei kiba ka la wanrah nabar jylla hynrei ban khmih shwa ïala ki jong ki nongshong shnong ba kin im hapoh la ka jong ka jylla khnang ba kin ïoh trei ha ki kam bapher bapher bad ba ka jingtyrwa ban ai ram bapher bapher ban sengkam lajong kadei ban treikam bha khnang ba kiba kwah shim ram kin suk haba leit sha ki bank ban lait shah pynthut bad shah thlia ha kiba bun rukom kaba pynthait noh ïa kiba kwah shim ram.
