Shillong, Naiwieng 10 : Ka IIM Shillong ka la rakhe ïa ka sngikha bad sngi seng kaba 18 (Foundation Day) da kaba pyllait ïa kiba bun ki kam ba la sdang thymmai kiba thmu ban kyntiew ïa ka roi ka san, ka jingkyntiew ha ki sap ki phong, bad ka jingpynkup bor ha ka pule puthi ha kane ka thaiñ shatei lammingi.
U Lat ka jylla Meghalaya, u C.H. Vijayashankar, u la shim bynta ha kane ka prokram kum u kongsan ha ka jingdonlang u Ashish Kumar Chauhan, MD & CEO jong ka National Stock Exchange (NSE), bad ki dkhot ka BoG kiba kynthup ïa u Shishir Kumar Bajoria (Chairman, BoG), u Bah D.P. Wahlang, IAS Chief Secretary Meghalaya bad u Prof D P Goyal Director IIM Shillong nalor kiwei pat.
Ha kane ka sngi rakhe sngikha la sakhi ïa ka jingpyllait paidbah ïa ki 3 tylli ki kam ba la sdang thymmai da u Lat ka jylla, kaba pyni ïa ka jingkut jingmut jong ka IIM Shillong ïa ka jingkordor ka kam pule puthi bad kiwei ki kam ha ka imlang sahlang.
Kine ki kam kiba thymmai ba la pyllait ki dei ka Nurturing Minds School Adoption Initiative, ba la ïohi ïa ka jingïatreilang ka IIM Shillong bad artylli ki skul ha East Khasi Hills District ka Quidotto Memorial RCLP School bad ka Mawkasiang Umroh Presbyterian Secondary School da kaba buh ka thong ban pynlong ïa ka pule puthi kaba neh, nangta ka jingpynkup bor ïa ki samla pule, ki jingkyrshan jong ki nonghikai, ka jingpynkhlaiñ ïa ka jingïateh hapdeng ki kynhun, kiba dei ka jingïohi jngai jong ka IIM Shillong ban synniang sha ka imlang sahlang lyngba ki kam pule kiba shongdor.
Da ka jingïatreilang bad ka Small Industries Development Bank of India (SIDBI), ka IIM Shillong ka la pyllait ruh ïa ka Skill To Enterprise Model (STEM) program. Kane ka jingsdang kan ai ka jinghikai, ka jingsaiñdur, bad ka jingïarap pisa sha ki 30 tylli ki kam ha kane ka thaiñ shatei lammihngi, ka ban kyntiew ïa ki kam sengkam lajong bad ka jingkiew ki nongshong shnong.
Lyngba ka prokram Northeast Enterprise Empowerment Venture (NEEV), kaba la buh ka thong ban don ka jingïatreilang bad ki nongshong shnong, ka ban kyrshan ruh ïa ki kam sengkam lajong ki nongshong shnong, bad ban khmih bniah ïa ki jingeh kum ka jingkylla ka suiñbneng, ka jingjia ki kam poiwir, bad ka ïoh ka kot kaba neh.
Ha ka jingkren u Shishir Kumar Bajoria, Chairman of the Board of Governors, IIM Shillong, u la ïathuh halor ka jingpynïar jong kane ka jaka pule ban don bynta ha ka jingpynwandur ïa ka lawei ka kam pule puthi. U la banjur da kaba ong ba ka IIM Shillong ka don hangne ban shakri ïa ki nongshong shnong jong kane ka thaiñ shatei lammihngi bad ki jingïohi jngai jong ka ban pynlong ïa kane ka jaka pule kaba paw ha ka pyrthei haba ïadei bad ki jong kordor jong ki nong India.
Katba Prof. D P Goyal, Director IIM Shillong, u la batai halor ki jingïaid lynti jong kane ka jaka pule naduh ba la sdang ïa ka ha u snem 2008 bad haduh kine ki sngi da ka jingdon haduh 900 ngut ki samla pule. U la kdew ruh halor ki kam kiba kongsan jong ka IIM Shillong kiba ka la bteng ban pynleit jingmut ha ki kam ban pynneh pynsah, ki jingshem thymmai bad ka jingdonkam ban long ki nongïalam.
Ha kane ka prokram ki la don ki jingïakren halor kiba bun ki phang ba la sam bynta da u Ashishkumar Chauhan, MD bad CEO ka National Stock Exchange (NSE), bad u Shishir Kr Bajoria Chairman BoG, IIM Shillong, u Prof. Rohit Dwivedi, nalor ka jingkren na u Bhasmang V. Mankodi, ED, Morgan Stanley, Mumbai; u Ankit Bhargava, CEO of Foxberry Technologies Pvt Ltd., Pune; u Asit Jain, MD ka Mahavir Beverages Pvt Ltd., Visakhapatnam ba la batai ruh da u Atul Kulkarni, Member BoG, IIM Shillong, nalor kiwei kiwei.
