Shillong, Naiwieng 10 : Ban khring shuh shuh ïa ki nongjngoh kai pyrthei sha kane ka Jylla kumjuh ïa kito kiba kwah ban wan shangkai pyngad, la mih mynta sa kawei pat ka jaka jngohkai ha ki thaiñ Pynursla kaba la ai kyrteng ha u President barim ka Ri, kata da ka Dr. APJ Abdul Kalam Memorial Eco Park.
Kane ka Eco park ka don hajan ka Dr. APJ Abdul Kalam Memorial Herbal Garden ha syndah ka shnong Siatbakon jong ka Raid Shabong Khyrim Syiemship ha ka jaka ba la ai sngewbha da ki Khun Trai Sawkur, Khapumsong bad Phlang u diak – Siatbakon, Pdeng Raid, kiba hap hapoh jong ka Khun Kur Longtrai Lai Kynthei jong ka Raid Shabong kaba hap hapoh ka Pynursla Civil Sub-Division.
Ka dei ruh ka eco park kaba itynnad bha bad kaba don ïa ki jaka shongkai pyngngad ba la shna ha pdeng jong ki khlaw bad ka wah ba tuid katkum ka jingpynwan dur bad ka mariang
Kane ka Dr. APJ Abdul Kalam Memorial Eco Park ka don ïa ka jingheh kaba long kumba 5 akar bad la buh ruh ïa ki lieng ban pynbyrngia ïa ki nongwan kai ha ka Wah Diengrot khnang ba kin ïoh ban shongkai sngewbha bad ka don ruh ïa ki jaka lehkai jong ki khunlung khynnah bad ruh ka jaka bam kaba la buh hapoh jong ka park.
Na ka liang ki nongpynïaid jong ka Park ki la buh ruh ïa ki jaka sah na ka bynta kito ki briew kiba kwah ban sah sngewbha bad ki la pynbiang ruh ïa ka jaka ieng kali bad ka jaka leit bar kaba paka bad kaba shngaiñ.
Lah ban kdew ba ka jingtei ïa kane ka park ka long kum ban pynsah kynmaw ïa u President barim jong ka Ri India, u Dr. APJ Abdul Kalam u ba la noh synniang shibun eh sha ka pule ka puthi bad ka Science nalor ba u khlad ruh ha Shillong ha u snem 2015.
