Shillong, Nailur 13: Ka KHADC baroh kawei hadien ba la pynbna da ka shuti shiteng sngi ha ka sngi Thohdieng bad kaba la buh ruh ban plie ïa ka Ophis treikam ki khlieh nongsynshar shnong ha ka sngi Thohdieng ka la hap ban pynkynriah noh sha ka 16 tarik mynta u bnai na ka daw ka jingkhlad noh u Bah Heh Latiplang Kharkongor uba ki paidbah ki ju khot ieid u Bah Heh uba long ruh u MDC ka Nongthymmai uba la khlad noh ha ka janmied jong ka sngi Palei ha Civil Hospital Shillong hadien ba ka jingpang ka la bat ïa u lah slem bha.
U Bah Heh u la long u MDC la saw sien lynter bad u la jop nyngkong eh ha u snem 2004. Ha kine ki 20 snem u la bat ruh kum u EM ka Trade ka Elaka bad kiwei kiwei bad u la bat ruh shipor kum u CEM.
Ha kane ka sngi nalor u CEM u Bah Pynïaid Sing Syiem la kren sngewlem ruh da u Deputy CEM u Bah PN Syiem nalor ka jingdonlang ki khlieh nongsynshar shnong na ki hima bapher bapher bad kiwei kiwei.
Ha ka jingkren na ka liang u CEM u la pynpaw ïa ka jingsngewsih halor ka jingduh noh ka KHADC sa uwei pat u MDC uba treikam ha kaba shit kaba shai.
“Nga la ju ïatreilang ba u Bah Heh u long u briew uba shisur shi dur bad uba kren beit ïa kaba dei ban kren khlem da ïa shah liang bad kane ka jingkhlad noh ka jong u ka long ka jingduh kaba khraw ïa ka KHADC baroh kawei,” ong u CEM ka KHADC u Bah Pynïaid Sing Syiem.
Nalor ka jingdon lang kiwei ki MDC bad ki EM na ka liang u Deputy CEM ka KHADC uba bat ruh ka tnat Elaka u Bah P N Syiem u la ong ba ka Council baroh kawei ha kane ka sngi ka dap da ka jingsngewsih kaba khraw halor ka jingduh noh sa uwei pat u MDC napoh Nongthymmai Constituency. “Ha ka jingshisha mynta ka sngi ngi la mut ban aiti noh ïa ka kamra sha ki khlieh nongsynshar hangne ha KHADC hynrei na ka jingjia kaba ym poi pyrkhat jong ka jingkhlad noh u MDC jong ngi u Bah Latiplang Kharkongor ngi la hap ban pynkynriah noh sha ka sngi Nyngkong ka 16 tarik ha ka por 1 baje nohphai sngi. Ka Council hi baroh kawei nalor ba ka la ai shuti shiteng sngi ïa ki nongtrei ka dap da ka jingsngewsih kaba jur halor ka jingkhlad kaba ym poi pyrkhat jong u Bah Heh Latiplang bad kumta na ka liang ka EC ka la rai ban shu pynlong noh tang da ka jingïalang sngewlem ha kane ka sngi,” ong u Bah P N Syiem. Ha kane ka sngi ka la don ruh ka jingsngap jar kaba ar minit ban pynpaw ïa ka jingsngewlem halor kane ka jingjia kaba sngewsih.
