Shillong, Nailur 13: U Chief Executive Member ka KHADC u Bah Pynïaid Sing Syiem, ha ka sngi Thohdieng ula ong, ba ka Council kan sa phah da ka jingthoh sha ka Sorkar Jylla ba kam dei ban shah ïa ka kynhun kaba ïalap ban khang bam doh Masi ba kan wan pynlong yatra ha jylla.
Halor kane haba ïakren bad ki nongthoh khubor, u Bah Pynïaid ula ong, “Ka Council ka pyrshah jur ïa ka kynhun kaba ïalap khang bam doh Masi bad ka Council kan ym lah ban pdiang namar ba ka jaidbynriew ka don ïa la ka bam tynrai ha ka ban bam ïa ki jingbam bad ïa ka doh kum ka doh Masi bad kiwei kiwei.”
“Ka Council kan ïeng ban pyrshah ïa kino kino ki kynhun kiba thmu ban shim kabu ïa ka jinglong kyrpang ka jaidbynriew la ka long ha ka bam ka dih, ka kup ka sem, ka khyndew ka shyiap bad kiwei kiwei bad lada ki pyrshang ban pynbakla noh, kim banse ban khang ïa kum kine ki kynhun,” ong u CEM da kaba bynrap ba ka kynhun kaba nabar ka jylla kam dei ban wan tuklar ha kane ka jylla.
U CEM ula ong ba ka Council kan sa phah da ka jingthoh sha ka sorkar jylla ba kadei ban tehlakam ïa ka kynhun kaba ïalap ba dei ban khang bam doh Masi ha kane ka jylla bad kan pynkynmaw ruh ïa ka sorkar jylla ba 98% na ki jaka ha ka jylla kidei kiba hab ha ka Sixth Schedule.
