Jowai, Jymmang 20: Ka Rotary Club Jowai ha kane ka 19 tarik u Jymmang kala pdiang burom ïa ka jingwan ïuhkjat u Dr. M.S. Konwar Major Donor, District Governor 3240, ha ka jingïalang ba la pynlong ha Infinity Conference Hall Mooralong.
Ïa ka jingïalang la pynïaid da u Rtn. M.Passah, MPHF President Rotary Club Jowai la sdang ïa ka jingrwai ïa ka sur National Anthem ba la shim bynta da baroh ki dkhot ka seng, katba u Rtn. Rudolf E.Laloo PHF ula ai ki kyntien pdiang burom sha baroh kiba wan sha ka prokram.
Ha kane ka sngi la ïoh ban pynsngew ïa ki kam ba ka seng kala dep ban synñiang hapoh ka imlang ka sahlang da u Rtn. Dr. K. Syngkon katba u Rtn. E.F.Gatphoh, MPHF, Chair person of Rotary Foundation Committee ula pynsngew ïa ka pisa kaba la noh kylluid da ki dkhot sha ka Rotary International bad la aiti ïa ka Cheque ha u District Governor.
Ha kane ka jingwan ïuhkjat u District Governor 3240 la py nlong ruh ka jingpynkup burom ïa ar ngut ki nongshong shnong na sor Jowai hapoh ka jingpynïaid u Director of Vocational Service Rtn. D. Toi bad ki dkhot ka Rotary Club Jowai kiba la ibit ban pynkut burom ha une u snem ïa ki ar ngur ki dei na ka shnong Panaliar, Jowai kata ïa u ma R. Konel Phira uwei na ki nongthoh sur jingrwai, nongpynmih Phlim Jaiñtia bad u nongak ba la pawbha, kumjuh ïa u ma Ram Kynjin uba don ïa ka sap ban shna ïa ki tiar ba bunjait bad uba long ruh u nongoh dur ba trim.
U ma R. Konel Phira haba ai jingkren ula pynpaw ka jingsngewnguh ïa ka Rotary Club Jowai kaba la shim ïa kane ka bynta kum ka lad ban ai mynsiem lem ïa kiwei ba kin lah ban pynpaw pynthei shuh shuh ïala ki sap ki phong ba ki don.
U Rtn (Dr) M.S. Konwar Major Donor, District Governor 3240 ha ka jingkren ula pynshlur ïa kitei ki ar ngut ba kin sam lem ïa ka sap ba ki don sha kiwei de khnang ban kane ka sap ba ki don kan sah ha ka pateng kaba dang wan.
Ha ka juh ka por u ai khublei ïa ka seng kaba trei shitom na ka bynta ka imlang ka sahlang khamtam ha kine ki snem ba la dep jong ka khlam Covid-19.
