Jowai, Jymmang 20: Ka Hynñiewtrep Youth Council War Jaiñtia Circle mynta ka sngi kala phah syndon da ka jingujor sha u MLA ka thaiñ u ma Lahkmen Rymbui bad kumjuh sha ka Sub-Divisional Officer Amlarem Sub-Division Amlarem halor ka jingthut jong ka bording hapoh ka shnong Padu West Jaiñtia Hills District.
Katkum katei ka shithi jingujor ka seng lyngba ka Padu Unit kala pyntip ba ka jingduh bording ha katei ka thaiñ jong ka shnong Padu Bah kala long naduh ka 16 tarik u Jymmang 2022 bad haduh mynta ka sngi ka jingduh bording ka dang bteng hapoh ka shnong bad kane ka la buh jingeh ha kiba bun ki liang.
Ka seng kala ong ba kane ka jingduh bording ka dei na ka daw jong ka jingduh noh u Transformer uab don hapoh jong katei hi ka shnong. Kumta ka kyrpad jur ïa ki bor ba dei khmih ba kin shimkhia mardor ban bujli ïa u Transformer na ka bynta ka jingmyntoi jong ki paidbah nongshong shnong bad khamtam eh ïa ki khynnah skul.
