Khliehriat, Jymmang 20: Ka surok bah ha sor Khliehriat ruh ka la shah ktah haduh katta katta na ka daw ka jingther jur u slap myn ha kine ki sngi ba la leit, kumta ki dkhot jong ka East Jaintia National Council Khliehriat Circle mynta ka sngi ki la ïa mih bad maramot da kaba pyndap da ki maw ïa ki jaka kiba la pei thliew hapdeng surok, ha ka surok National highway ha Khliehriat West.
Ha kane ka jingmaramot la ïashimbyntalang ruh da u President rangbah ka seng u bah Sambormi Lyngdoh bad u Vice President EJNC-CEC, u bah Ency Shadap lem bad ki dkhot jong ka Khliehriat Circle.
Na ka liang u General Secretary jong ka EJNC Khliehriat Circle, u samla Mebanteilang Sukhlaiñ, u la pynpaw ka jingsngew khia halor ka jingjulor ka surok ha sorbah Khliehriat ha kaba ka surok ka la pei thliew bad long kum ki pung ba lang um hapdeng surok kaba la wanrah ïa ka sniewdur ka sor Khliehriat, kaba long ruh ka Head Quatar jong ka East Jaintia Hills District, na ka liang ka seng ka kynthoh jur ruh ia ka National Highway Authority of India bad ïa ka company shna surok ka G.R.Infra bad ong ruh ba ka jing julor ki surok khamtam ha Khliehriat ka dei namar ka jingtrei thulmur palat ki nongtrei kiba shna ïa ka surok kiba la shu trei tang ban dep, ha kaba tang shu hap u slap ka surok ka la pei thliew bad kane ka jingjulor ka surok bad ka jinglang um kum ka pung hapdeng surok ka buh jingeh bad buh jingma haduh katta katta ïa ki kali kiba iaid lyngba na kane ka surok ha Khliehriat. Ka jingjulor ka surok ha Khliehriat ka buh jingeh ym tang ïa kiba ñiah kali hynrei ka buh jingeh ruh ïa ki paidbah kiba iaid da ka kjat namar ba ka dei ha ka jaka ïew ba bun briew.
“Katba lah la ka bor ngi kum ka seng ngi la shu pyndap maw hi ïa ki jaka kiba la long thliew palat khnang ban kham pyn suk ïa kiba ñiah kali bad ngi kyntu jur ïa ka NHAI ba ka dei ban shim khia ban maramot noh mardor ha ka rukom kaba dei ïa ka surok ha Khliehriat bad ngi kyntu ruh ba ka dei ban da marmot janai bha khnang ba ka surok kan skhem bad kan neh, namar kumba long mynta kane ka surok tang shu wan u slap ka la pei thliew bad julor bad buh jingeh ïa ki paidbah” pynpaw bad ban shuh shuh u samla Mebanteilang Sukhlaiñ.
