Plie u DC ka Ri-Bhoi ïaka CMYC ha Umling ban ai jinghikai ïaki Samla ban ïeng hala ki jong ki kjat

Nongpoh, Jymmang 30: Ban ailad ïaki khynnah ki ba don sap ban pyntbit ïalade haki ba bun ki laiñ naduh ki kam shet, shna jingshna, kam suh jaiñ haduh ki kam ïalehkai bad ki wei ki wei naka liang ka sorkar kaba la ïaleh ban plie lad ïa kum kine ki samla ba kin kyntiew bad pynshlur ban trei ki kam lajong haki ba bun ki liang lane ka Self Design Learning Space ban ïeng hala ki jong ki kjat, mynta sngi la ioh ban plie paidbah ïaka ka Chief Ministers Youth Centre ha Umling da u Deputy Commissioner ka Ri-Bhoi Arpit Upadhyaya ha ryngkat ka jingdon lang u BDO ka Umling Block bad ki nongïalam jong ka MCYC.
Haba kren hakane ka sngi naka liang u DC u la ong ba ka jing wanrah ka sorkar ïaka MCYC ka long kaba ai jingmyntoi ïaki samla ha kane ka juk ba mynta ba kim dei ban shanñiah tang haki kam sorkar hynrei ban ïeng hala ki jong ki kjat,namar kane ka center ka ailad ïaki riew don sap ban pyntbit ïalade haka sap kaba ki don bad ka long ruh kum ka jing seng kam lade lyngba kane ka centre.
U la pynpaw ruh ka jing sngewkmen haba kane ka centre kaba dang 3 bnai kala lah ban pynmih iaki shibun ki samla bad ki briew ki ba don ïa ki sap ki jong ki bad u la kyntu ruh bad ki dei ban pyndon kam bha ïaka ne ka centre bad ka sap kaba ki don ba ki kiew shaphrang ban pynroi ïaka sap kum ka lad iohkam bad kamai.
Hakane ka sngi naka liang ka MCYC ka la pynlong ruh da ka jing pyni nam ïaki tiar bapher bapher ki ba ki shet bad shna hi da ki samla bad rangbah ki ba don hakane ka center, ka sabon ka ba la sdang shna da 3 ngut ki long kmie bad kaba la sdang ïaid haka thain Ri-Bhoi kaba la ai kyrteng kum ka PRP bad shibun ki wei pat ki jing pyni nam.
La pynbyrgnia ruh ïaki paidbah hakane ka sngi da ki jing rwai jing shad bad ka jing iaid pyni riam hakaba ïaki jingpynwan dur ïaki jaiñ phong la leh hi daka MCYC Umling.