Wer ki Sengbhalang ka EJHD sha ka jingialang paidbah halor ka ‘Reservation Policy’

0

Khliehriat, Jymmang 30: U bah Sambormi Lyngdoh, president rangbah ka East Jaiñtia National Council uba dei ruh u Genl Secy ka Jaiñtia Coordination Committee For Reservation Policy (JCCRP) kawei na ki shatri jong ki seng bhalang kaba kynthup naduh ka EJNC, JSU, JSM, JYF kumjuh ki Synjuk Ki Waheh Chnong Ri Jaiñtia, ki Synjuk Waheh Chnong Jowai ka wer ia ki nongshong shnong jong ka East Jaiñtia Hills District ban ïa mih sha ka jingiakhih shong kyllaiñ Mungor ba la khot pynlong da ka JCCRP mynta ka step 31 tarik Jymmang ha Khliehriat, ha u Kot u Woh Kiang Nangbah hajan ka ophis u Deputy Commissioner kum ka dak ban pynbor ïa ka sorkar lane kum ka dak ban pyni sha ka sorkar ba kum ki nongshong shnong jong ka district ba ka la dei ka por ban bishar bniah ne review ïa ka Reservation Policy kaba la rim bah.
Une u nongïalam u la ong ba kane ka mat (issue) ka dei kaba la ktah ïa man la ki longïing longsem jong ka ri Ri Khasi bad Jaiñtia hi baroh kawei.Kumta u wer ïa baroh ki longkmie ki longkpa, ki samla pule bad kiwei pat kiba don ka jingsngewkhia na ka bynta ka pteng ka ban dang wan sha kane ka jingialang.
Kumba ka long mynta u la ong ba kane ka policy ka la noh shiliang haduh katta katta na ka bynta ki Khasi Jaiñtia, hynrei kane ka la dei ka por ban bishar bniah bad pynthymmai noh ïa kane ka reservation policy katkum ka jingbun paid jong ka jylla.
Shuh shuh u la ong ruh ba kane ka jingialang ka long ruh kum shibynta ban ai mynsiem bad ai jingkyrshan ïa u Bah Ardent Basaiawmoit u nongïalam jong ka VPP uba dang shong shah thngan mynta lah phra sngi kynthih hakhmat ka Additional Secretariat ban dawa na ka sorkar ban bishar bniah biang ha kaba ïadei bad ka reservation policy.

Leave A Reply

Your email address will not be published.