Khliehriat, Jymmang 30: Kum shibynta ban kyntiew ïa ka koit ka khiah, ka Meghalaya AIDS Control Society, Shillong, ha ryngkat ka jingïatreilang bad ka ophis u Deputy Commissioner ka East Jaiñtia Hills District, lem bad ka ophis jong u District Medical & Health Officer, East Jaiñtia Hills District, kan sa pynlong ïa ka jingialap paidbah lane ka campaign ban ialap paidbah ha kaba ïadei bad ka koit ka khiah.
Ha kane ka jingïalap paidbah yn ïa shim bynta lang ruh ki tnat sorkar bapher bapher bad kane kan neh haduh lai bnai kynthih ka ban sdang naduh u bnai jylliew 2023, ha kane ka prokram kaba lai bnai yn don ruh ki prokram bapher bapher kum ki prokram jingsam dawai ei, kum na ka bynta kito ki pang khmat, ba pang bniat, kiba don ka jingpang HIV, STI, TB bad kiwei kiwei ki jait jingpang.
Kane kan sdang ha ka 2 tarik u jylliew 2023 ha Khliehriat West Community Hall bad ha kane ka juh hi ka sngi yn sdang ruh ha Sutnga CHC.
Na ka liang ka MACS ka khot ka wer ia ki paidbah ba kin ia wa sha kine ki jingïalang pynsngewthuh khnang ba kin tip ban ïada na ki jingpang ba bun.
