Nongstoiñ, Jymmang 30: Katba u bah Ardent Miller Basaïawmoit u dang bteng ïa ka jingshah thngan namar ka sorkar kam shym pat la mynjur ban pynkylla ne pynbha ïa ka bhah thungkam, ka jingkyrshan jong ki paitbah ka la nang khlaiñ ha baroh ki bynta jong ka rilum Khasi Jaiñtia.
Kane ka juh ka jingkhih mynsiem ka la jia ka la paw paidbah biang, ha kaba ka jingkyrshan jong ki paitbah ka la paw mynta ka sngi sa ha Nongstoiñ West Khasi Hills, ha kaba ki nongshong shnong ryngkat ki sengbhalang baroh ki la ïatylli lang kawei da kaba pynlong ïa ka jingïaid paitbah kaba la sdang na jan ka State Bank of India haduh khmat ïew Nongstoiñ.
Haba la poi ha khmat ïew Nongstoiñ la pynlong ïa ka jingïalang pynshai paitbah ha kaba la pynïaid da u bah Gabriel Sohlang. Ha katei ka jingïalang la ïoh ïa ka jingkren na ki nongïalam jong ki sengbhalang kum ka HYC, HANM, HNYF, MYF, WKSU, WYF bad kiwei kiwei ba kynthup ïa ka MYM na Mawshynrut.
Ki nongïalam sengbha-lang haba ai jingkren ki la ong ba katei ka mat jingdawa, kam dei satia tang jong kano kano ka seng saiñ pyrthei hynrei ka dei ka mat jingdawa na ka bynta ka jingmyntoi jong ka jaitbynriew Khasi Pnar baroh kawei.
Ki la ong ruh ba ka jingïaid paitbah jong ki kam dei na ka bynta ban pynïoh jingmyntoi ïa kino kino ki nongmihkhmat ne ki seng saiñ pyrthei, hynrei ban pynïoh ïa ka hok jong ki khun ki kti ha ki pateng ban wan.
Nalor kata ki la ther tyngeh ïa ki lai ngut ki nongmihkhmat na West Khasi Hills, namar ka jingbym shimkhia jong ki ban pynsngew ïa katei ka mat jingdawa sha ka sorkar kaba ki la leit ban kyrshan. Ki la kyntu ïa ki ba kim dei ban shu shong kli kti, hynrei ki dei ban kren bad ban ym ailad ba ka sorkar kan shu leh mynthi halor katei ka jingdawa.
Ki la ther tyngeh ruh ïa ki MLA na ri lum Khasi Jaiñtia da kaba ong ba hato ki kham lah ka shuki ne khaml ah ka jaitbynriew. Lada ka kham lah ka shuki, ki dei ban kynmaw ba dei ki paitbah kiba pynshong ïa ki ha ka shuki bad lada kim kren ei ei ki paitbah hi kin weng noh ïa ki na ka shuki.
