Leit tur ka Sur u Paidbah SWKH sha ïing u MLA ka Mawkyrwat ban dawa kren halor ka Reservation Policy

Mawkyrwat, Jymmang 30: Ka Sur u Paidbah jong ka South West Khasi Hills District mynta ka sngi ryngkat ki jingthoh bad ki jingpyrta ba pynkylla noh ïa ka Reservation Policy (RP) hapoh jong ka Jylla Meghalaya, ki la leit ban tur ha ïing u MLA ka Mawkyrwat Constituency kaba don ha Mawkyrwat, South West Khasi Hills District.
Ïa ka kynhun jong ka Sur u Paidbah jong ka South West Khasi Hills District la lamkhmat da u samla Pynkhraw Kharjahrin bad u bah Wallam Syiemiong ryngkat ka jingsynranlang da ki samla, ki rangbah bad ki longkmie. Hadien kata na ka liang ka Sur u Paidbah jong ka South West Khasi Hills District ka la ïoh ruh ka lad ban ïa kynduh markhmat ïa u MLA ryngkat ki kyntien ba u dei ba kular ban shimkhia ïa kane ka kam khnang ba ki khun jong ka mynta bad ka ban sa wan kin nym ïa kynduh jingeh hynrei ba ka dei ban beit da kaba thymmai ha ka rukom thung-kam thung-jam.
Ha ka jingïakren, na ka liang u bah Wallam Syiemiong na ka Sur u Paidbah jong ka South West Khasi Hills District u la buh ka jingkyrpad ïa u MLA ba um dei ban shu sngap halor kane ka bynta hynrei u dei ban shimkhia khnang ba kan long kaba myntoi ïa baroh. U la ong ruh ba kane ka jingïaid paidbah ka long ba kum ka kynhun ka shu bud-dien ïa kaba ki la dep ban pynlong ha kine ki sngi kiba la dep ban pynsngew biang hakhmat u nongmihkhmat jong ka thaiñ ba u dei shim ka jingkitkhlieh ïa kane ka mat ka jura ba kum ka jaidbynriew ka ïa kynduh mynta.
Ha kane ka sngi u la kyrpad ruh ïa u nongmihkhmat ba u dei ban kren ei ei ha ka sorkar ba dei ban pynbeit thymmai noh ïa ka Reservation Policy namar la ju ïohi ba haba la jied ïa u nongmihkhmat, ka la dei ka kamram jong u ban leh ei ei halor kata ka mat ne ban ïa ksait ïa kita ki jingeh jong ka jaidbynriew bad kam dei shuh ka kam jong ki sengbhalang ban leh ïa kata namar la dep ban pynkhamti ha u nongmihkhmat ban un long u ksiang jong kiei kiei baroh. “Lada ngi shu ïa rwai ieit ri ne rwai jingïatylli tang ha ka por elekshon kam don jingmut haei haei ruh em”, ong u bah Wallam namarkata, kum u nongmihkhmat nangne shakhmat u dei ban pyni ïa ka jinglong rangbah lyngba ki kam ha kaba ïa dei bad ka Reservation Policy.
Katba na ka liang u bah Renikton Lyngdoh Tongkhar, u MLA ka Mawkyrwat Constituency haba kren hakhmat jong ki nongïalam jong ka Sur u Paidbah, South West Khasi Hills District u la ong ba kumba u la buh ha ka kot kyrpad ne ka Appeal u la ong ba kum u nongmihkhmat ryngkat ka UDP baroh kawei kim shym la shongkli-kti hynrei ki la dep ban kren bad ki don ruh ka jingsngewkhia halor kane ka mat jingdawa. Namarkata, u la buh ka jingkyrpad ïa ki paidbah ba kin long kiba ai ka kti kamon ka kti kadiang ryngkat ka jingïatreilang halor kane ka bynta khnang ba ka jingdawa kan long kaba seisoh.
Ym tang kata, u la ong ruh ba kumba ki paidbah ki la jied biang ïa u kum u nongmihkhmat bad ïa kane ka mat jong ka jingpynthymmai ïa ka Reservation Policy ruh u la dep ban kren hapoh ka Assembly ryngkat u bah Ardent M. Basaiawmoit. U la pynsngew ruh ba ym tang kata, hynrei ïa kane ka mat jingdawa la ju ïa kren ruh katba don ki jingïalang hapoh jong ka UDP ne wat ha ki jingïalang hapoh Assembly namar ki sngewthuh ba ka long kaba donkam eh.
U la kyrpad ïa ki samla ba kin don ruh ïa ka jingkitkhlieh ban wanrah ka jingsuk jingsaiñ ha kaba baroh ki don ka jingkitkhlieh bad jingshimkhia ïa kane ka kam bad lada ki kren ne kim kren hynrei baroh ki don ïa kajuh ka thong kynthup naduh ki Nongmihkhmat, ki nongïalam jong ki party bapher bapher.