Ngin wanrah ïa ki jingkylla dur kiba paka lada u Bah Vincent u wan ha ka bor, kular ki heh ka congress
Wan ïalap elekshon ki heh Congress na Delhi na Assam bad na Andhra Pradesh na ka bynta u Bah Vincent ha Saipung
![](https://mawphor.com/wp-content/uploads/2023/02/IMG20230220143221_01.jpg)
Khliehriat rymphang 20: Ki heh jong ka congress party ba kynthup u MP na Assam, u Gaurup Gagoi, u MP na Andra Pradesh, u J.D Shatam, ka MP barim na Delhi, ka Alka Lamba bad kiwei kiwei, mynta ka sngi ki la wan poi ha shnong Saipung na ka bynta ban ïalap election na ka bynta u bah Vincent Pala, uba dei u kyrtong jong ka party Congress uba ïakhun na ka Sutnga-Saipung Constituency, ha kane ka lympung la ïa don ryngkat lang ruh utei ukyrtong, lem bad ki paidbah nongkyrshan jong u.
Haba kren ha ka jingïalang, kitei ki heh jong ka congress bad kumjuh ruh u bah Vincent Pala ki la pynsngew sha ki paidbah ïa ka jingangnud jong ki ban wanrah ïa ka jingkylla dur kaba paka (positive change) hapoh kane ka constituency bad kumjuh ruh hapoh ka jylla hi baroh kawei bad ïa kane yn lah ban pynurlong lada u kyrtong u poi sha ka thong bad wan ha ka bor kum u myntri rangbah ka jylla, kitei ki heh ka party, ki don ruh ka jingkyrmen ba u kyrtong ka congress un poi sha ka thong ha kane ka election.
U Gaurup Gagoi, u la kynthoh jur ïa ka sorkar MDA kaba la synshar ha kine ki san snem ba la leit bad ong ba ki bun sa tang ki kynrum kynram suda hapoh ka jylla, ka jingmih ki kam sniew, ka jing kynrei ki drok, ka jing jur ki kam jingthombor ïa ki kynthei, ki khynnah, ka bamsap, ka jingmih ki seng mafia, ka jingbym ïaid beit ka jingpyntreikam ïa ki skim, kine ki la buh jingeh ïa ki paidbah ka jylla, u ïathuh ruh ba ka congress ka lah ban wanrah ïa ka jingkylla dur kaba paka lada ka ïoh ban synshar bad kin bun ruh ki lad pynroi ban kyntiew ïa ka thaiñ bad ïa ka jylla baroh kawei “Lada u bah Vincent Pala u poi sha ka thong, un ai saw tylli ki cylinder Gas ïa baroh ki long iïng kiba duk, ka party kan kyrshan ruh ïa ki khynnah pule kiba naduuh nursery haduh class XII khlem donkam ban siew pisa bad shibun shuh shuh ki lad ban kyntiew ïa ka roi ka kiew bad ka ioh ka kot” u la ong.
U la ong ïa ki paidbah ba ki dei kiba donbok shisha ba ki ïoh ïa u kyrtong kum u bah Vincent Pala, uba ju kren bad pynsgew barabor ïa ki jingdonkam ki paidbah, kum ki skul, ki surok, ki hospital bad uba ju don ka jingangnud ban wanrah ïa ka roi ka kiew hapoh ka jylla, u ong ruh ba ka seng congress ka dei ka party ka bym ju peit shiliang khmat, ka burom ïa baroh ki nongshong shnong jong ka ri India katba ka BJP pat kam burom satia khamtam ïa ki nongshong shnong jong ka thaiñ sahtei lam mih ngi, u pynpaw ruh ïa ka jingsngew skhem ba u bah Vincent Pala un jop ha kane ka election bad ong ba kane ka dei ka kabu ban ïoh noh da ki nongïalam kiba thymmai hapoh ka jylla Meghalaya ban wanrah ïa ka jingkylla hapoh ka jylla baroh kawei.
Ka Alka Lamba, ka ba na ka nongbah Delhi, ka la pynsngew ïa kiba bun ki lad jingïarap kiba ka party ka don na ka bynta ki paidbah, ki ban long ka jingmyntoi ïa ki bad ong ruh ba ka kam kaba nyngkong eh kaba u bah Vincent Pala un leh lada u poi sha ka thong, ka long ban ïarap bad kyrshan ïa kito ki longkmie kiba duk, ki bym don kurim shuh da kaba ai T3000 tyngka man la u bnai bad ruh un pyntreikam ïa kito ki san tylli ki mat treikam jong ka party (5 Star Commitments for Meghalaya), kiba dei ki lad ban kyrshan ïa ki paidbah nongshong shnong, ka la kyrpad ïa ki paidbah ba kin pynjop ïa une u kyrtong bad lada u long kum u myntri rangbah ka jylla, un wanrah shibun ki lad pynroi bad kyntiew ïa ki nongshong shnong, ka ong ong ruh ba u bah Vincent Pala u dei uba ju trei shitom bha na ka bynta ka jingbit jingbiang ki paidbah.
U bah Vincent Pala, haba kren ha ka lympung jingïalang, u la pynpaw shibun kiei kiei kiba ki paidbah jong ka jylla ka donkam, kum ka bor ding electrict, kaba dang donkam shuh shuh sa kumba 350 MV, lada lah ban pynurlong ïa kane kan ïarap ïa ki paidbah ha ka jingioh pahuh ka bor ding, kumjuh ruh ka long ka lad ïoh kam ïoh jam ki nong shnong shnong, kin bun shuh shuh ki karkhana kiban mih namar ka jingbiang ka bor ding, u don ruh ka jingangnud ban kyntiew ïa ka jingnang jingstad da kaba un pynioh ïa ka lad ban kyrshan skul ïa ki khynnah kiba naduh ki class ba rit haduh ka class XII khlem donkam ban siew pisa, ban wanrah ïa ki skul bah (University), u la ong ba “lada ka jaitbynriew ka biang ka jingnang jingstad kan nang kiew ruh ka jaitbynriew”
U la kren ruh halor ki mat ban weng noh ïa ki jingeh jong ki nongrep, ki nong khaïi ba kin lait noh na ka jingshah lute, jingshah daiñ kuna, kumjuh ruh ban pyniaid beit ïaid rynti ïa ka jing sam ïa ki tin sop ïing sha baroh ki paidbah bad un weng noh ruh ïa ka bam sap hapoh ka jylla, u la ïathuh ruh “Nga kum u MP haba nga leit sha delhi, haba nga kren shaphang ka Meghalaya, ki ju ong ba ka dei ka jylla kaba jur ka bamsap hapoh ka ri India (Most corrupt state in india), nga sngew lehraiñ, hato, ngin ai biang ïa ka vote ha ki, lada ngi shah thied ïa ki vote ha kum kine ki briew kiba la tip kum kiba lute, kiba ju bamsap bad lada ngi thep biang ïa ki, hato ma nga ma phi ngin long ki briew kiba kumno? dang don ka lad lada ngi kwah ba ki khun kin iohkam iohjam, lada poi ha ka bor ngi kular ban ai kam ïa khun kito kiba na ki long iïng kiba duk ba kyrduh”
“Ha kaba ïadei bad u dewïong, nga la dep ong, to ngin shna ïa ka aiñ ba ka ïingbishar (SC) ka la dep ai ïa rulling ban shna ïa ki aiñ bad ynda la dep ban shna ïa ka aiñ ngin phah sha ka sorkar pdeng ban ïoh ban peit bad bishar ïa ki aiñ, hynrei ïa kane ruh ym don ban leh, namar lada ki leh ïa kane kin duhnong ïa lade, ka jingshim pisa na ki kali dewïong kaba da ki klur tyngka shi miet, da kane ka pisa mynta ki iakhun election”
Ha kaba ïadei bad ka jingshah thied ki briew, u la ong ba “Lada kiwei ki thied , dei ban shu pynngam ïa ka spah jong ki lada ki wan tyrwa pisa ïa phi ha ïing, namar kato ka dei ka pisa u paidbah, ka pisa ka sorkar, ka pisa kaba ki ïoh na surok, kynmaw ba ka pisa kan leit sha pla tangba ka vote te sha ka kti”
“Kane ka ri jong ngi, ka dei ka ri kaba riewspah ha ri india, ka jingdon u dewïong, u mawshun bad kiwei kwei ki mar poh khyndew, ki mar rep, ngi don ruh ka par umphniang ha khappud, hynrei ki nongïalam pat kidei kiba shu kular kai ha ka por elction bad ki die ïa ngi” ong u bah Pala.
U la kyntu ia ki paidbah nongkyrshan ba ki dei ban long kiba skhem jingmut, kumjuh ruh ban ai ka lad ïa u ba un poi sha ka thong ba ki jingkylla kin wan bad ban dup lah abn weng noh ïa ka bamsap bad ki jingeh jong ki paidbah nongshnong shnong.