Ha Shillong yn plie ïa ka Centre of Excellence in Online Gaming kaba nyngkong ka ri India
![](https://mawphor.com/wp-content/uploads/2022/07/mawphor-1.jpg)
Shillong: K’lyngkot, 13: Ka Digital India Startup Hub lyngba ki Software Technology Park jong ka ri kan plie ïa ka Centre of Excellence in Online Gaming kaba nyngkong jong ka ri ha nongbah Shillog shuwa u Lber 2023, la ong u Myntri Khynnah ka sorkar pdeng ba dei khmih ïa ka Tnat Electronics & Information Technology and Skill Development & Entrepreneurship, u Rajeev Chandrasekhar.
La kyrmen ba ka Centre of Excellence ha Shillong kan kyntiew ïa ki startup bad kiba treikam lajong na ka thaiñ Shaei Lammihngi ban tei ïa ka Gen Online Gaming ecosystem ka ban wan.
“Ka dei ka thong jong u Myntri Rangbah duh u Narendra Modi ba ka bynta kaba thymmai jong ki startup bad ki nongseng kam lajong kadei ban long na Shillong, Kohima bad kiwei kiwei ki bynta jong ka thaiñ Shaei Lammihngi jong ka ri,” la ong u Rajeev Chandrasekhar haba ïakren bad ki lad pathai khubor ha ka jingïalang ha nongbah Shillong.
Ka long kaba donkam ban kdew ba ka tnat Electronics and IT (MeitY) dang shen ka la sam ïa ki jingpynkylla ha ka Draft jong ka IT Rules 2021 ha kaba ïadei bad ka Online Gaming na ka bynta ka jingïamir jingmut paidbah.
U Myntri Khynnah u Rajeev Chandrasekhar ha ka jingai jingkren ha ka Software Technology Park ha nongbah Shillong
U Myntri u la ban ruh ïa ka jingdonkam jong ka jingtbit ha ki kam digital hadien ka Covid, namar ka jingpynkylla digital ïa ki mar, ki jingshakri bad ki tiar ka la bteng ban kiew ha kylleng ka pyrthei. “Ka jingai jinghikai ha ki kam Digital ïa ki samla jong ka thaiñ Shaei Lammihngi kan ïarap ïa ki ban ïoh kam ïoh jam bad ka jingseng kam lajong ha ka ïoh ka kot lyngba ki kam digital kaba long ka jingngeit jong ka Sorkar u Narendra Modi.”
U Myntri u la pynbna sa kawei ka sienjam jong ka MeitY ban plie ïa ka jaka kaba la biang lut katkum ka juk mynta hapoh ka National Institute of Electronics and IT (NIELIT) ban ai jinghikai ha ki kam digital ha nongbah Shillong. La pynkhreh ïa ka jaka kaba 10 acre na ka bynta kane ban pynbiang ïa ka jingdonkam ai jinghikai jong ki samla ha ka thaiñ Shaei Lammihngi.
U Myntri u la pyntip ruh ba ka Sorkar ka la plie biang ïa ka Skill India lyngba ka PMKVY 4.0, ka ban ai jinghikai ïa kumba 50,000 ngut ki samla ha Meghalaya ha ki jingpyntbit katkum ka juk ban wan ha kaba don lad ban ïoh kam ha ki kompeni. “U Myntri Rangbah duh u Narendra Modi u dang tei ïa ka India kaba thymmai kaba don ki jingthmu ba thymmai bad ki jingangnud na ka bynta ki samla jong ka ri.
Kine ki long ki kabu kiba bun ba don mynta bad kumta ki sap treikam kilong kiba donkam ban shim kabu ïa kine ki lad. Ki sap treikam kilong ka Passport ba thymmai sha ka jingseisoh,” u la bynrap. Ha kaba ïadei bad kiwei kiwei ki jylla ha ka thaiñ Shaei Lammihngi, ka Tnat Skill Development & Entrepreneurship hapoh ka PMKVY4.0 ka la buh thong ban ai jinghikai kumba 60,000 ngut ki samla ha Tripura bad 35,000 ngut ki samla ha Nagaland ha ki jinghikai kiba bun.
U Myntri u la wan jngoh ar sngi ïa ka Jylla Meghalaya bad un leit phai noh sha Delhi mynta ka miet.