Mawkyrwat, Nohprah, 29: Ka Ïawpaw Football Club mynta ka sngi ka la long ka kynhun kaba jop hadien ba ka la lah ban pynliem noh pyrshah ïa ka Laitkynsew Resort Football Club da 2 – 1 kol ha ka lympung ïalehkai jong ka Mawlangwir Football Community Shield (MFCS), 2022 – ’23 ba la pynïaid da ka Mawlangwir Sports Club ha Madan Saitsnad, Mawlangwir, South West Khasi Hills District.
Ha ka jingïalehkai, ka Ïawpaw Football Club ka la ïoh ban pynkhih jar nyngkong eh ïa ha kaba u Jeffry Senong u la ïoh ha ka minit kaba 26 kaba dei ha ka jingïalehkai jong ka kyllastep bad ha ka jingïalehkai jong ka kyllamiet pat kane ka kynhun ka la ïoh biang sa kawei pat ka kol ha ka minit kaba 63 lyngba u Damanbhalang Chyne bad lyngba kane ka kol ka Laitkynsew Resort FC kan shym la duh mynsiem hynrei ka dang ïakhun triang ban ïoh ban pynkhih jar bad dei tat ha ka minit kaba 67 ka la ïoh kawei ka kol lyngba u Fernando Kurkalang ha kaba ka la nang ai mynsiem ïa ki ‘rangïalehkai jong ka Laitkynsew Resort FC ba kin dang ïa khun tyngeh biang hynrei bun ki jingpyrshang kim shym la urlong.
Kumta haduh ba kut jong ka jingïalehkai ka Laitkynsew Resort FC kam shym lah shuh bad ka jingïalehkai ka la kut noh ha kaba ka Ïawpaw FC ka la jop noh da 2 – 1 kol pyrshah ïa ka Laitkynsew Resort FC.
Ka jingïalehkai kaba bud jong kane ka Mawlangwir Football Community Shield (MFCS), 2022 – ’23 kan long ha ka 10 tarik u Kyllalyngkot, 2023 hapdeng ka Ïamonlang Football Club na Nongstoiñ pyrshah ïa ka Lynshing Sports Club na Shillong ha ka por 1 baje nohphai sngi.
