Kwah dik dik ki paidbah ban ïoh ïaid noh ïa ka surok na Thiep-Bamon sha Mawpud: HNYF

Mawkyrwat, Nohprah 29: Ki paidbah jong ka shnong Thiep-Bamon bad Mawpud ki la kwah dik dik ban ïoh ban ïaid noh ïa ka surok thymmai ba la dep mang ban pyntrei naduh ki snem kiba la leit, hynrei na ka daw jong jingsuki u nongpyntrei kane ka surok haduh mynta ym pat shym la ïoh ban pyndep ha ka por kaba biang.
Lah ban kdew ba ïa kane ka surok Thiepbamon sha Mawpud kaba jngai kumba 2.60 Km kaba ha ka jinglut T. 4.95 klur la buh mawnongrim ha ha ka 30 tarik u Risaw, 2020 da u bah Pius Marweiñ, u MLA/MDC jong ka Ranikor Constituency.
Ka Hynñiewtrep National Youths Front (HNYF) jong ka South West Khasi Hills District ha ka jingleit jurip ïa ka surok ba dei ïaid na shnong Thiep-Bamon sha Mawpud ka la kyntu ïa u kontraktor ba u dei ban pyndep noh kloi katba lah khnang ba ki paidbah ki nym ïa kynduh jingeh ha kaba ïa dei bad ka ïaid ka ïeng bad ka ban pynjan ruh ïa ki ban kiew sha Mawkyrwat.
U bah Shining Wanniang, Vice President ka Hynñiewtrep National Youths Front (HNYF), South West Khasi Hills District haba kren ha ki lad pathai khubor u la pynpaw ka jingsngewkmen ban ïoh ban ka surok ba dei ban ïaid na shnong Thiep-Bamon sha Mawpud ka la paw ki dak ki shin hynrei kaba sngewsih ka long ba na ka jingsuki palat u nongpyntrei kane ka surok kam shym la urlong ne pyndep ha ka por ba la buh. Kumta u la buh ka jingkyrpad ïa u nongpyntrei ba u dei ban pynstet ïa ka kam khnang ba ki paidbah jong ka dong ka thaiñ ki suk ha ka leit ka wan ban kan kham pynjan ruh ïa ki nongleit nongwan kiba thmu ban wan donkam ha Mawkyrwat.
U la kyntu bad kyrpad ïa u nongpyntrei bad kumjuh ruh ïa ka ophis PWD (Roads) ba ki dei ban shimkhia bad ïa leh katba lah ban kham pynstet ïa ka kam khnang ba ki paidbah jong ka dong ka thaiñ kin ïoh ïa ka jingsuk ha ka leit ka wan ban kiew sha Mawkyrwat na ka bynta ki jingdonkam jong ki namar kumba la long mynta ki la hap ban ïaid ïa ka lynti kaba jngai bha ba ki hap ban hiar shwa ha Umpung bad kiew sha Ranikor hynrei ynda la dep kane ka surok na Shnong Mawpud sha Shnong Thiep-Bamon ka la kham pynjan shuh shuh bad khnang ba kan long ka jingmyntoi ym tang ïa uwei na ar ngut hynrei ïa u paidbah jong ka dong ka thaiñ baroh kawei namar kumba ka don ka jingong, “Ka surok ka dei u bud lum jong ka ïoh ka kot”, kumta ruh ki dei ban ïaleh katba lah ban pyndep ha ka por kaba biang ba ka mariang ruh ha kine ki bnai ka dang ailad.
Ki la buh ruh ka jingkyrpad ïa u Nongmihkhmat jong ka dong ka thaiñ ba un kren lem ha ki bor ba dei peit bad kyntu ruh ïa ki nongpyntrei ba kin kham pynstet ïa ka kam namar ka surok ka long kaba donkam bad ba ki paidbah jong ka dong ka thaiñ kin nym don ha ka jingsohsat namar ha kine ki dong ki thaiñ ki dang don shibun ki jingduna.
Ha kane ka sngi la synran lang da ki nongkitkam bad ki dkhot jong ka Hynñiewtrep National Youths Front (HNYF), Mawkyrwat Circle bad kumjuh ruh ki dkhot jong ka Mawpud Area Unit.