3 sngi ai por ka HNYM ban pynbiang ïa ki kot ki sla ha kaba pyntrei ïa ka jingksam ïa ki pipe gas ha Ri Bhoi

By Mawphor News Desk On Dec 30, 2022

Nongpoh, Nohprah 29: Ban pyrshah jur halor ka jingbym burom ka Kompani ïa ki bor synshar shnong bad khlem da bud ïa ki kyndon ha kaba pyntrei ban ksam ïa ki pipe gas ha ki shnong ba hap ha Ri Bhoi, ka Hynñiewtrep National Youth Movement (HNYM), Ri Bhoi District mynta ka sngi ka la ai por syndon tang 3 sngi ba dei ban pynbiang ïa baroh ki jingdonkam bad lada ka Kompani ka pyrshah ka seng kam banse ban shim da kiwei ki lad ki lynti.
Na ka liang ka Seng HNYM, Ri Bhoi District ka la ai por syndon ïa kane ka Kompani ba la tip kum ka Indradhanush Gas Grid Limited Meghalaya (IGGLM), ka dei hadien ba mynta ka sngi ki nongïalam ka seng ki la leit ban jurip ïa ki jingpyntreikam ka Kompani ban ksap ïa ki pipe gas kaba la sdang hapoh ka thaiñ Mawbri ha Bhoirymbong ha Ri Bhoi District bad la lap ruh ba kane ka Kompani kam shm la lah ban pynbit pynbiang ïa ki kot ki sla ba donkam naduh ka jingpan jingbit na ka Dorbar Shnong Nongrim Nongladaw bad na ki bor ka Khasi Hills Autonomous District Council (KHADC).
Haba leit ban jurip ïa ki jingtih na ka bynta ban pynïaid ïa kitei ki pipe gas la lam khmat da u Bah Petrius Khymdeit kum u President ka HNYM, Ri Bhoi, u Bah Khrawkupar Warjri, working president lem bad kiwei kiwei ki dkhot ha kaba la ïa donlang ruh u Bah Karbius Lyngdoh, Rangbah Shnong ka Nongrim Nongladaw bad kiwei de ki nongïalam Shnong.
Haba kren sha ki lad pathai khubor hadien ka jingwan jutip ïa kitei ki kam ba pyntrei da ka Kompani, u President ka HNYM, Ri Bhoi, u Bah Petrius Khymdeit, u la ong ba kane ka Kompani kaba pyntrei ha kaba tih ïa ki pipe line ban pynpoi ïa ka Gas sha ki jylla ka thain Shatei Lam Mihngi ka ri India kaba ïaid lyngba ruh na Ri Bhoi District ka dei ka Kompani Indradhanush Gas Grid Limited Meghalaya bad kaba sgewsih ka long ba kane ka Kompani kam shym la bud katkum ki kyndon ba dei ban leh bad khlem da ioh bor ka la sdang ïa ki kam ban pyntrei ha kaba tih ïa ki pipeline ban pynpoi gas ba kum ka seng ka da pyrshah jur.
U la ong ruh ba ka seng ka pyrshah jur ruh ka dei halor ka nongrim ba kane ka Kompani khlem da ioh NOC na ki bor shnong bad na ka KHADC bad khamtam ka jingwan rah ïa ki bar jylla ba pyntrei ïa kane ka kam bad ka la
Ïaid shakhmat ïa ka kam khlem da ioh jingbit na ka Dorbar Shnong bad ruh na KHADC khamtam ka Labor License.
U la ïathuh ruh ba ka kam ka la ïaid ruh na ka Shnong Nongrim Nongladaw bad katba ka bor shnong pat kam shym la ioh jingtip satia ba ki pyntrei ïa katei ka kam wat lada ka dei ka jaka ba hap ha u pud u sam ka Shnong.
Shuh shuh, u la bynrap ruh ba ka seng ka lyngngoh ba kane ka Kompani ka ioh jingbit na ka Dorbar ka Raid Ïapngar ban pyntrei ïa ka kam bad katba ka jaka ba pyntrei ïa ka kam pat ka dei hapoh ka Raid Bhoilasa bad namar kane ka daw ka seng ka ai por 3 sngi ba dei ban ïaid katkum ki kyndon bad lada kam lah ban leh kumta kum ka seng ka hap ban ïaid da kawei pat ka lynti ban pyrshah ïa kane ka Kompani, u la bynrap.