Nongstoiñ, Nohprah, 29: Ka jingsangeh jong ki Kontraktor ban pyntrei ïa ka skhim um bam um dih lyngba ka Jaal Jivan Mission naduh u bnai Nailur haduh mynta, kam shym la ïaid beit shuh kumba ka dei ban long namar baroh ki Kontraktor kiba hap hapoh ka PHE Western Circle Contractors & Suppliers Association kaba la ïalam da u bah J.T.S Thongni President ka Association kaba kynthup ruh ïa ka Mairang, Nongstoiñ bad Mawkyrwat Division ki la sangeh ban pyntrei.
U Bah J.T.S Thongni president ka Association haba ïakren bad u nongthoh khubor, u la ong ba ka jingsangeh jong ki Contractor ban pyntrei ïa katei ka skhim, ka dei namar ba hadien ki la thep ïa ki Tender bad ki la pyntrei ïa ki jingtrei, ka sorkar ka la khate ïa ka pisa kaba dei na ka bai bylla jong ki nongtrei kaba ki kontraktor ki dei ban ïoh.
U la ong ruh ba ka sorkar ka la kam ba ka jingkhate ïa ka bai bylla ka long na ka bynta ban siew ïa ka bai tiar sha ki Kompeni kiba pynpoi ïa ki pipe bad kiwei kiwei ki tiar. U la ong ruh ba ka jingleh jong ka sorkar ka la ktah haduh katta, ha kaba ki la hap ban leit ai da ka jingthoh sha ka sorkar, ban pynkynmaw biang ba lada kam pat lah ban pyntreikam ïa ka dor kaba ka la dep pynthymmai, ka dei ban pyntreikam shuwa da ka dor ka barim hynrei kam dei pat ban ktah ïa ka bai bylla.
U la ong ruh ba wat la ka Association ka la leit ai da ka jingthoh bad ka la ïakren ruh man ka por, hynrei haduh mynta ka sorkar kam shym pat la jubab satia. Kumta na ka liang ka Association ka dang ïai ap ba ka sorkar kan jubab bad katba ka sorkar kam pat ai kano kano ka jubab kaba shai, kin ym pat sdang ban pyntrei.
U la kyntu ïa baroh ki Kontraktor kiba ïoh jingtrei hapoh ka tnad PHE, ba ïa mynta kin sangeh shuwa ban pyntrei hynrei lada ka sorkar ka sngap mynthi kim banse ban leit tied jingkhang sha Ïingbishar bad dawa ïa ka hok jong ki.
