Rakhe ka St. Savier’s College & HSS, Umoid ïa ka sngi ba kyrpang ki kmie ki kpa ne ka Parent’s Day

Mawkyrwat, Risaw, 23: Ka St. Savier’s College & Higher Secondary School, Umoid, South West Khasi Hills District ha ryngkat ka jingphuh jingphieng mynta ka sngi ka 22 tarik u Risaw, 2022 ka la ïoh ban rakhe ïa ka sngi kyrpang jong ki kmie ki kpa ne ka Parent’s Day ha kaba u bah Renikton Lyngdoh Tongkhar, Myntri ka tnad umbam umdih jong ka Jylla Meghalaya bad MLA jong ka Mawkyrwat Constituency ula long kum u kongsan.
Haba kren ha ka jingïalang, u bah Renikton Lyngdoh Tongkhar u la ong ba ka dei ka sngi jong ka jingkmen ban ïoh biang ïa ka lad ban ïeng ha khmat jong ki samla pule, ki nonghikai bad kumjuh ruh ha khmat jong ki nongpynïaid jong ka St. Savier’s College & Higher Secondary School, Umoid ha kaba da ka jingdon kane ka shlem ai jinghikai ha ka pule puthi ka la long kawei na ki jingkyrkhu ba khraw ïa ki samla jong ka dong ka thaiñ baroh kawei. Kumjuh ruh u la ong ba da ka jingwan jong kane ka shlem ai jinghikai hapoh ka Mawkyrwat Constituency ka la long ruh da ka jingshisha ka jingaimynsiem na ka bynta ki samla pule ba kin ïa beh ban wan pule hangne namar ka la long kawei na ki jaka ai jinghikai kaba paka. “Kan ruh long ka jingsarong da shisha ba lada ki khun jong nga kin ïoh ban wan pule ha kane ka jaka, hynrei sngewsih pat ba ki khun jong nga ki la ïa heh lut bad mynta ki la don sha kiwei pat ki jaka”, ong u bah Renik.
Namarkata, u la ong ba ha kane ka jingrakhe ïa ka sngi ba kyrpang jong ‘ki kmie ki kpa’ ne ka ‘Parent’s Day’ kan pynkynmaw ba ki long kiba donbok haduh katta katta ba ki la ïoh ïa kane ka kabu ban phah pule ïa ki khun jong ki ha kane ka jaka namar ka la dei kawei na ki shlem ai jinghikai ba paka bad ba kin sngewsarong ha kane ka bynta ba ki ïoh ban phah ïa ki khun ha kane ka St. Savier’s College & Higher Secondary School ka bym duna ei ei shuh haba ïa nujor bad ki jaka pule ba bit bha ha kylleng ka pyrthei. Kumta u la ai mynsiem ïa ki nongpynïaid bad ki nonghikai ba kin nang trei shitom shuh shuh nangne shakhmat namar ma u ruh u dang khmih lynti bad angbud shibun ba kane ka jaka pule ba kane ka skul kan nang kiew na kawei ka por sha kawei pat ka por.
Ha kawei pat ka liang, u la kubur ba ka dei ka jingbakla kaba khraw ba ki khun jong ngi na kane ka dong ka thaiñ kin dang pyrkhat ban leit wad jaka pule ha kiwei de ki jaka kum ha Shillong ryngkat ki jingpyrkhat ba kane ka skul ha Umoid kam pat biang hynrei haba wad bniah pat naduh tynrai kane ka skul ka la long kaba paka bha ban phah pule ïa ki khun ki kti. Ha kajuh ka por, u bah Renikton u don ruh ka jingkhmih lynti ba ka jingpynkylla dur ïa kane ka dong ka thaiñ ka dei lyngba ka jingwanrah da ki shlem ai jinghikai kiba pala ha ka pule puthi.
Khadduh, u la ai khublei na ka bynta ki kmie ki kpa kiba la ïa wan lang ha kane ka sngi bad kiba la sakhi ruh ïa ki sap ki phong ba ki khun ki kti jong ki ki don lyngba ka jingpyni jong ki ha ki bynta bapher bapher bad kaba la long ruh palat ïa kaei ba kum ki kmie ki kpa ki khmih lynti ban ïohi ïa ka jinglah jong ki ban pyni paidbah.
U la ai ruh ka jingkhublei kaba kyrpang na ka bynta u Fr. Paul Coelho uba la long da shisha u nongprat lynti uba tbit ban khring ïa ki samla pule ba kin ïoh ban wan shah hikai ha ki lad jinghikai bapher bapher. Ym tang kata u la ai ruh ka jingkhublei na ka bynta ki Father, ki Sister bad baroh kiba don bynta ha ka ban kyntiew ïa kane ka jaka pule.
U Fr. Paul Coelho SJ, u Principal jong ka St. Savier’s College & Higher Secondary School, Umoid ha ka jingkren lamphrang ha kaba ïa dei bad kane ka sngi ba ki la rakhe kum ka sngi kyrpang jong ‘ki kmie ki kpa’ ne ka ‘Parent’s Day’ u la pynpaw ba ka St. Savier’s College & Higher Secondary School, Umoid ka don ha ka ïa ka jingthmu ban rakhe ïa kane ka sngi kyrpang manla u snem namar ka long kaba kongsan. U la ong ruh ba kane ka dei ka sngi jong ka jingsngewnguh na ka bynta ki kmie kpa kiba la shim ïa ka synjam bad jingkitkhlieh ban phah ïa ki khun jong ki ha kane ka shlem ai jinghikai bad ka dei ruh ka sngi ha kaba ki khun jong ki mynta ka sngi kin pyni ïa kaei kaba ki ki la ïoh jinghikai.
U la ong ruh ba ka long ka jingkmen namar ki la ïoh ban rakhe ïa kane ka sngi kum kawei ka ïing bad long thik kum shi-ïing shi-sem ha kaba naduh ki nonghikai, ki samla pule kiba thymmai bad kiba rim ki la wan lang, bad kumjuh ruh ryngkat ki kmie ki kpa. U la ong ruh ba kum ki nonghikai ruh ki don ïa kata ka mynsiem jong ka jingïatreilang bad ki kmie ki kpa ban ai ki lad jinghikai ïa ki khun jong ki ha ki por baroh.
U la pynkynmaw ruh ba kum uwei na ki nonghikai ne u nongai jingshakri ïa ki para briew ha kaba u la don bynta ha bun tylli ki jaka jong ka pule puthi kum ha ki skul bad ki kolej, u la lap ba ki samla pule hangne ha St. Savier’s College & Higher Secondary School, Umoid ki long shisha kita ki samla pule kiba kloi ban ai ka jingïatreilang, kiba pyni ïa ka akor ka burom kaba bha , kiba ai ka jingïasnohkti lang, kiba kylluid mynsiem bad kumjuh ruh kiba don da shisha ïa ka mynsiem ban tip. “Kaei kaba sngewsih, ba kiba bun hi ki samla pule ki don hapdeng ki jingduna ba bun haba ki wan shah hikai ha kane ka jaka bad kane kam dei ka jingbakla ka jong ki kmie ki kpa ne jong ki khynnah, hynrei ka dei ka jingbym ïoh bha ïa ki jinghikai naduh dang rit”, ong u Fr. Paul.
Namarkata, u la ong ruh ba kum ki kmie ki kpa ki don shisha ïa ka mynsiem jong ka jingsngewsarong ïa ki khun la jong bad ha kajuh ka por ki khuslai ruh na ka bynta jong ki bad na ka liang jong ki nonghikai ruh ki khuslai namar ki khun ki im ha kane ka juk jong ka jingkylla jong kane ka juk ha kaba noh shibun ki jinghikai ba sniew kum ka ‘mobile phone’ ba lada u khynnah ne u samla pule u pyndonkam hok un lah ban kiew hynrei lada u pyndonkam bakla tang katta u la jot.
Kumta, kumba ki kmie ki kpa ki don ka jingïatreilang bad ki nonghikai ha ki por baroh, u Fr. Paul Coelho u la kyrpad ïa ki ba ki dei ban ïarap bad peit bha ïa ki khun ba kin don ka por ba kin pule kot ha ïing namar ki nonghikai ki ai ki jinghikai ha ki jaka pule hynrei kin nym lah pat ban peit bniah na ka bynta jong ki, bad ki hap ruh ban pule hi da lade. U la ai mynsiem shuh shuh na ka bynta ki kmie ki kpa ba ki dei ban pynthikna ruh ba ki khun jong ki kin pule kot manla ka sngi ha ki ïing ki sem, bad kawei pat ba kin peit ruh kan nym don kano kano ka jingshah pynthut ha ka por ba ki dang don hapdeng ki jingpule ne kin don ïa ka jaka kaba paka. U la kyntu ruh ba ki dei ban ai ruh ha ki ka jinglaitluid na ka bynta ka jingbha, bad kum ki kmie ki kpa ki dei ruh ban tip ba ki khun jong ki ki leh aiu bad ki don shano, kylli ruh ba ki pynlut haei ïa ka por, ïa ka pisa ba ki ki ïoh, bad ha kano ka rukom ki pyndonkam ïa ki tiar ki tar ba ki kmie ki kpa ki ai.
U la ai mynsien ruh ba kum ki kmie ki kpa ki dei ruh ban don ka por ban ïa kren bad kylli na ki khun ba ki don ki paralok kiba kumno, namar ha kane ka juk, ki khun jong ki ki ioh jingthikao shibun kiei kiei ym tang na ki kmie ki kpa ne na ki nonghikai skul hynrei ki tip ruh shaphang bun kiei kiei lyngba ki paralok bad lada ki ïoh ïa ki paralok kiba bha ki lah kylla bha bad lada ki ïoh ïa ki paralok kiba sniew hangta ki sa kylla sniew bad ka jingim jong ki ruh kan sa troiñ.
U la ong ruh ba lada don kaei kaei ba kum ki kmie ki kpa ki kwah ban pan jingïarap, kum ki nonghikai ki long kiba la kloi ban leh ïa kata namar kum ki nonghikai ki don ha ki ïa ka thong ban wanrah ïa ki jingbha ha ki liang baroh bad ki kwah ruh ba ki khun jong ki kin long ki nongjop ha ki por baroh.
Ha kane ka jingleh burom ïa ki kmie ki kpa la sakhi lang da u MDC ka Mawkyrwat Constituency, bah Carness Sohshang, u Parish Priest ka Mawkyrwat, Rev. Fr. Friding Khar-syiemïong, bad kiwei de kiba la shah khot sngewbha.