Dawa ka UHM ban kyntiew kyrdan noh ïa ka Mawlangsu Sub Centre

0

Nongstoiñ, Risaw, 23: Ka United Hynñiewtrep Movement West Khasi Hills ka la leit ban buh ïa ka Memorandum hapoh ka jaka treikam I District Health & Medical Officer West Khasi Hills, na ka bynta ban dawa kyntiew kyrdan noh ïa ka Mawlangsu Sub centre shaka kyrdan Primary Health Centre (PHC).
Ki Nongïalam ka UHM ki la ong hadien ka jingwan kyrpad ki nongïalam shnong katei ka thaiñ, ki la shim ïa ka jingkitkhlieh ban kit lem ïa ka khia ka shon bad ïathuh ruh ba katei ka Sub Centre ka ai jingshakri ruh ïa ki 13 shnong, kaba hap ruh ha ka jingpeit ka Markasa PHC Eastern West Khasi. Mynta kitei ki hap ha ka West Khasi Hills bad ki lah jngai ruh na ki jaka sumar ba kham biang, khamtam ha ka shitom ba kynsan ka buh jingeh ïa ki paidbah katei ka thaiñ, namar ka jingjngai ki jaka sumar ba biang ha kaba bun na ki paid nongshong shnong kibun kidei kiba duk.
Ka seng ka ong ba lyngba ka jingkyntiew kyrdan ïa katei ka Sub Centre kan long ka jingkyrkhu bad jingmyntoi ïa ki paidbah ban ïoh ka jingsumar kaba biang bad ba bha khamtam katkum kane ka juk. Na ka liang I DMHO ka West Khasi Hills, I la kular ban leh kloi ïa kaba donkam na ka bynta katei ka Sub Centre bad phah ruh ban leit peit ïa katei ka Sub Centre ha kiba dei peit ïa katei ka jaka, khnang ban ïoh leh ïa kaba donkam.

Leave A Reply

Your email address will not be published.