Mawkyrwat, Risaw 20 : Ka Maharam Government Higher Secondary School, Mawkyrwat ka la dei sa kawei pat ka shlem ai jinghikai ne Center nalor ka Nativity Higher Secondary School, Mawkyrwat na ka bynta ban ai jinghikai bad pyntbit ïa ki khynnah ha jingïalehkai bapher bapher kaba dei jong ka ‘Khelo India’.
Lah ban kdew ba ka Maharam Government Higher Secondary School, Mawkyrwat ka la ïoh ïa ka jaka ban hikai ha kaba ïa dei bad ka jingïasiat khnam ne Archery bad ha kane ka jingïalehkai kin don kumba 30 ngut ki khynnah shynrang bad kynthei kiba la shah jied ban long ki khynnah ki ban shah ai jinghikai pyntbit ïa lade ha kane ka jingïalehkai.
Ïa kane ka jaka ai jinghikai la plie pyrda da ka kong J.U. Kharpuri, MCS, Additional Deputy Commissioner, South West Khasi Hills District ha ryngkat ka jingïadonlang u District Sports Officer (DSO), u Bah Damang Syngkon, u In-charge Principal jong ka Nativity Higher Secondary School, Mawkyrwat, u Bah Wando Nongbet ryngkat ka jingsakhi lang ki khynnah skul bad ki nonghikai.
Ka kong J.U. Kharpuri haba kren ha ka jingïalang ka la ai mynsiem na ka bynta ki khynnah shynrang bad kynthei kiba la shah jied ban long ki nongshah hikai ha kane ka jingïasiat khnam ba kim dei ban pynleh noh ei ïa ka por wat tang shi second ruh ha ka por ba ki dang don ha ka jingshah hikai namar lada kim pynleit jingmut kan sa long ka jingduhnong kaba khraw. Ka la pynkynmaw ruh ba ka jingïasiat khnam ha ki por mynshwa ka dang dei tang ka rongbiria hynrei mynta pat ka la long kawei na ki jingïalehkai kiba lah ban pynim ja lada ki nongïashimbynta ki lah ban pyndonkam hok ïa kata ka sap kaba ki ki don.
Ka la ai mynsiem na ka bynta ki khynnah ba ki dei ban minot bha ha kane ka bynta bad ha ka por ba ki shah hikai ruh kin da pyni ïa ka jingshlur bad ka jinglah jong ki ryngkat ka jingïatreilang bad ki nonghikai khnang ba ki nonghikai kin ïoh mynsiem ban ai ki jinghikai kiba bniah bad ba paka.
