Rem ki kynthei, jop ki shynrang ha ka kriket ka BCCI

0

Shillong, Risaw 20 : Ki thei ïalehkai ka jylla Meghalaya ki la mad nam rem da phra wicket ha ka Mizoram ha ka lympung ïalehkai Senior Women’s T20 Trophy kaba long ha Bangalore hynne ka sngi Palei
Ka Meghalaya ka la tied nyngkong hadien ba ka Mizoram ka la jop ïa ka jingkynting pisa, ha kaba ka la shah pynhap lut baroh ki wicket da kaba kamai tang 91 ron ha ki 18 over. Ka Sejal Raut bad ka Daïaka Warjri ki kamai ron lang da 45 ron ha ka jingduh noh da 3 wicket.
Ka Raut kadei ka thei tied bol ba kamai bun ron tam na bynta ka Meghalaya da 38 ron na ki 39 bol, katba ka Daïaka Warjri ka kamai 13 ron na ki 24 bol. Phewse, na ka jingduh noh ïa ki ar wicket hapoh ka shi over ka Meghalaya na ki 62/2 wicket ka kamai tang 91 ron bad mad ka jingshah pynhap lut baroh ki wicket.
Ha ka inning kaba ar, ka Mizoram ka la duh noh ar wicket hynrei ka la lah pat ban pyndep ïa katei ka thong tang ha ki 16.3 over. Ka Debasmita Dutta ka ïoh 1 wicket ai kamai 10 ron bad ka Ajima Sangma ka ïoh 1 wicket ai kamai 17 ron na bynta ka Meghalaya. Ka jingïalehkai ba khatduh jong ka Meghalaya kan long ha ka sngi Saitjaiñ pyrshah ïa ka UP.
Haba phai pat sha ka kynhun jong ki shynrang kiba ïashim bynta ha ka Syed Mushtaq Ali Trophy T20, ka la jop da kaba pynliem da 49 ron ïa ka Arunachal Pradesh ha ka jingïalehkai ha Mohali.
Ka Meghalaya kaba tied nyngkong ka kamai 167/5 wicket ha baroh ki 20 over. U Chirag Khurana u kamai 73 ron na ki 61 bol bad u Swarajeet Das 28 ron na ki 17 bol.
Ha ka pali tied jong ka Arunachal Pradesh, u Rajesh Bishnoi u khur 3 wicket ai kamai 17 ron, u Khurana 2/8 ron bad u Riboklang Hynniewta u ïoh 2 wicket ai kamai 19 ron. U Doria u kamai bun ron na bynta ka Arunacha, Pradesh da 40 ron, hynrei kamai tang 118 ron duh noh 8 wicket.
Ka Meghalaya kan sa ïakhun khatduh pyrshah ïa ka Kerala ha ka sngi Saitjaiñ.

Leave A Reply

Your email address will not be published.