Ar ngut yn leit pyntbit ki nongkiew lum ka jylla ha ka Himalayan Mountaineering ha Darjeeling

Shillong, Risaw 20 : Ka Meghalaya Sport Climbing and Mountaineering Association (MeSCMA) ka la jied ïa arngut ki nongkiew lum ka Jylla ki ban leit ïashim bynta ha ka jingai jinghikai Advance Mountaineering Course at Himalayan Mountaineering Institute (HMI) kaban long ha Darjeeling naduh ka 19 tarik Risaw haduh ka 15 tarik u Naiwieng 2022.
Ki arngut ki nongkiew lum ka jylla kiba la shah jied ban leit ïashim bynta ha katei ka jingai jinghikai ha Darjeeling ki long ka samla Valarie Suchiang na Shangpung, West Jaintia Hills bad u samla Rilang Dkhar na Umshaken, Ri-Bhoi District.
“Ka Meghalaya Sport Climbing and Mountaineering Association (MeSCMA) ka sngew sarong ban pyntip ba ki arngut ki dkhot jong ka kynhun ki la shah jied ban leit ïashim bynta ha ka Advance Mountaineering Course at Himalayan Mountaineering Institute (HMI) ka ban long ha Darjeeling,” ong ka kyrwoh khubor na ka Kong Malviancy Shabong kaba dei ka President jong ka MeSCMA.
“Kane ka course ai jinghikai kan sdang naduh ka 19 tarik Risaw haduh 15 tarik Naiwieng bad ba la ïarap bei tyngka da ka Directorate of Sports and Youth Affairs jong ka sorkar jylla (Meghalaya),” bynrap ka kyrwoh khubor.
Shuh shuh la ïathuh ruh ba kine ki arngut ki nongkiew lum ki la pyndep ïa ka Basic Mountaineering Course na National Institute of Mountaineering and Allied Sports (NIMAS) kaba la dep ban pynlong ha u Lber 2022 da kaba pyndep ïa ka kyrdan Grading “A” kaba dei ka jingpyndep kaba heh tam ha ka jingshah hikai kiew lum bad ba la ïoh ban leit ïashim bynta ha ka jingleit shah hikai ha Darjeeling kaba donkam ban don ka met ba koit ba khiah bad ka jingshemphang bad ban don ka jingsngew skhem ban long ki nongkiew lum.