Nongpoh, Nailar, 21: Da mynsiem kaba rhem bad ka jingieid ban sumar bad peit kyrpang ïaki riew tymmen ki bym don ki nongsumar bad ba peit ba khmih ïaki, ba kin ioh pat ban shong ban sah kum ka iing ka sem lajong, ka Kripa Foundation hapoh ka jingpeit jingkhmih jong ka kong Victoria Wahlang mynta ka sngi kila lah ban plie paidbah ïa kawei ka jaka ri bad sumar ïaki riew tymmen bala tip kum ka Kripa Victoria Senior Citizen Home ha Umroi.
Ïa katei ka iing la plie paidbah mynta ka sngi da u Father Joe Pareira, Kripa Foundation Founder Trustee, haka jingdonlang ka kong RM Kurbah Secretary ka tnad Health and Family Welfare Department, ka kong Emy Kharshandi District Social Welfare Officer, Ri-Bhoi District bad kiwei kiwei ki riew rangbah.
Katei ka jaka ri bad sumar ïaki riew tymmen kan ai jingshakri ei ïakito ki riew tymmen ki bym don shisha ki nongpeit nongkhmih bad kiba sumar ïaki ha kaba kin ioh ïaka jaka thiah bad ka jaka sumar kaba biang ba kim donkam ban siew naduh ka bam ka dih, ki dawai dashin ki ban sa don ruh da ki nongsumar kiba la dep pyntbit bad ki nonghikai ban kilan met ban ioh ka met kaba koit ba khiah.
Nalor katei ka kamra ka bym donkam ban siew la buh ruh ïaki kamra kyrpang bad ki jaka sah kiba hap ban siew kiba paka bad lyngba ka pisa kaba ioh lum na kitei ki kamra ba hap siew yn sa pynbiang pat ïakitei ki jaka sah jong ki riew tymmen ki bym donkam siew.
Kane ka dei ka jingiohi jngai jong ka kong Victoria Wahlang kaba dei ka kmie bad u Sherrard Wahlang u ba dei u khun, kiba la shem bad iohi da la ki jong ki khmat haba ki leit shabar ka jylla bad ka Ri halor ka jingitynnad bad sngewkmen ka mynsiem ban iohi ba ki riew tymmen ki bym don nongsumar lane ki bym don ki iing ki sem ki ioh ka jaka shongneh kaba paka bad kaba pynkmen kaba mynsiem kaba pyntkik ïaka mynsiem jong ki ban shna ha kane ka jylla, namar ki don ka mynsiem bad ieid ïaki riew tymmen.
Haba kren ha katei ka sngi naka liang u Father Joe Pareira u ba dei u nongshem jong ka Kripa Foundation Trustee u la pynpaw ka jingsngewkmen bad dei ka jingkyrkhu u Blei bala lah ban pynurlong ïaka jingplie ïa katei ka iing kaba peit bad khmih ïaki riew tymmen kiba donkam shisha ki nongïarap bad ki nongsumar ïaki ba kin ioh pat ka jaka shong jaka sah kum ka iing lajong.
Ka Kong RM Kurbah bad ka Kong E Kharshandi haba kren ha katei ka sngi kila pynpaw ka jingsngewkmen bad ai ka jingïaroh ïaka Kripa Foundation kaba la shim ïaka sienjam ban don kum katei ka mynsiem ban iohi jngai halor ka jingdonkam haka jylla ban don ki jaka ri bad sumar ïaki tymmen bala noh ka rta namar bunsien ha kane ka juk ba mynta ki kmie ki kpa ki ju shah ieh hala ki jong ki khun bad don ruh ki khun kiba leit ban pule bad wat kam wat jam shabar ba kim ioh ban ri ban sumar ïaki haka rukom kaba dei.
Hynrei dei ka Kripa Foundation kaba la jubab ïakitei ki jingeh mynta ka sngi hadien bala plie paidbah noh ïa katei ka iing ka ban sa ai ka jingshakri kaba paka tam ïaki tymmen ki kro ba kin ioh ka jaka sah bad ka jaka sumar kaba biang.
La pynphuh pynphieng ruh ha katei ka sngi da ki jingrwai myllung bala shim bynta da ki khynnah jong ka Kripa Foundation De-addiction Center.
