Hadien saw snem ba pynwandur, mih ka kot ‘Deuce’ ba thoh da u Ophisar ba la shongthait

Shillong, Nailar 21 : Ka Vice President jong ka Gracious Givers Foundation, ka Kong Noreen Majoric Dunai ha ka sngi Saitjaiñ ka la pyllait paidbah ïa ka kot, ‘Deuce’, ba la thoh da u Heh Ophisar (IAS ba la shongthait) ka jylla ba dei ruh u nongthoh ba paw, u Bah Aldous Mawlong.
Katei ka kot kaba ha ka ktien French ka mut ar tylli, ka dei ka khana shaphang ki arngut, kata ka Kim bad Jezebel. Kane kadei ka kot kaba saw jong u Bah Aldous hadien ka kot April Fairy (poitri), Collage (poitri) bad ka Soliloquoy (reflection).
Haba kren bad ki lad pathai khubor hadien ba la dep ban pyllait paidbah ïa katei ka kot, u Bah Aldous u la batai bniah kumno u poi thoh ïa katei ka kot kaba ki paidbah khlem artatien kin sngewtynnad ban pule ïa ka haduh kaba kut.
Ka Kong Noreen kaba dei ruh ka Mrs Shillong 2019, haba kren hadien ba la dep pyllait paidbah ïa ka kot ka la ong ba ka sngewkmen haduh katta katta ban ïoh pule ïa katei ka kot kaba la pynwandur sngewtynnad da u nongthoh.
Ka la ong ruh ba u nongthoh lyngba katei ka kot, u la pyrshang ban phah ïa ka khubor ba hapdeng ka jingkahdum u lyoh ka dang don pat ka jingkyrmen.
La ïoh ruh ïa ka jingkren na ka Mrs Classic India 2019, ka Kong Phiralin Nongbet kaba la ai lang ka jingïaroh ïa katei ka kot kaba u Bah Aldous u la thoh bad pynwandur bha.
U Bah Aldous ha kane ka sngi u la ïathuh ruh ba u la pynlut por haduh saw snem ban pyndep ïa katei ka kot namar kadei kaba u thoh lyngkot lyngkot bad pynwandur pat kum ka khana kaba pura.
“Ha kajuh ka por nga thoh bun tylli ki kot. Kumta haba nga ïoh jingmut ne ïoh mynsiem nga pynrung ïa ka ha kato ka kot kaba ïahap. Kane ka long ruh kumjuh haba ïadei bad ka poitri,” u la ong. La ïathuh ruh ba mynta u dang pynkhreh ban thoh pat sa ïa ka kot kaba san.
Ha kane ka sngi, u Bah Aldous u la pynpaw ba u thrang ruh ban don noh kawei ka rynsan kaba baroh ki nongthoh kin kynduh lang kynthup lang wat ïa kito ki nongthoh kiba dang pyrshang khnang ba kin lah ban btin lynti ïa ki.